Гауһар Дәуленқызы Зақұмбаева

Гауһар Дәуленқызы Зақұмбаева (1 қаңтар 1932 жыл, Шымкент) — кеңестік және қазақстандық ғалым, химия ғылымдарының кандидаты (1961), докторы (1971), профессор (1972), Ғылым академиясының академигі (1994).

Өмірбаяны

С.М. Киров атындағы Қазақ мемлекеттік университетінің химия факультетін бітірген (1954), химик, катализ саласының маманы.

Докторлық диссертациясының тақырыбы: «Кезеңдік жүйенің VIII тобы металдарының адсорбциялық және катализдік қасиеттерін зерттеу».

«VIII топ металдарындағы адсорбция мен катализ» (1973), «Органикалық қосылыстардың VIII топ металдарының беттерімен өзара әсері» (1982), «Металдық катализаторлар» (1982), «Жоғары бөлшектік металдық катализаторлар» (1987), «Синтез-газды катализдік қайта өңдеу» (2000) тәрізді 8 монографияның; Халықаралық және республикалық басылымдар, конференциялар, конгрестер және симпозиумдарда жарияланған 500-ден астам мақалалар мен баяндама тезистерінің авторы. 67 патенті және авторлық куәлігі бар.

КОКП мүшесі (1972–1991).

1954 жылдан бастап ол — ҚазКСР ҒА Химия ғылымдары институтының аспиранты, аға зертханашысы, кіші ғылыми қызметкері, аға ғылыми қызметкері, зертхана меңгерушісі. 1969 жылдан бастап — ҚазКСР ҒА (1995 жылдан ҚР БҒМ) Органикалық катализ және электрлі химия институты директорының орынбасары, зертхана жетекшісі, 1988 жылдан — директоры, бас ғылыми қызметкері.

Республикалық «Бейбітшілік үшін күрес» қоғамы төрағасының орынбасары (1975–1985); Президент жанындағы «Әйелдер, отбасы және демографиялық саясат» Республикалық Кеңесінің мүшесі (1992–1998); РҒА «Нефтехимия» және РҒА «Электрохимия» ресейлік журналдары редакциялық алқаларының мүшесі; Қазақстан премьер-министрі Даниал Ахметов басқаратын Жаңа индустриалдық саясат кеңесінің мүшесі.

ҚазКСР ғылым және техника саласындағы Мемлекеттік сыйлығының лауреаты (1974). ҚазКСР Еңбек сіңірген ғылым қайраткері (1982). Құрмет орденімен (1999), медальдармен марапатталған.

Отбасы

Әкесі — Дәулен Нетәліұлы Неталиев, марқұм, Ұлы Отан соғысының ардагері, инженер болып жұмыс істеген. Анасы — Марфуға Себғатқызы Неталиева, марқұм.

Қызы — Зарема Әбдірахманқызы Зақұмбаева. Немерелері — Темір және Төлеген.