Ілияс пайғамбар – Құранда аты аталған, тақуа діндар, пайғамбар. Ол өз тайпаластарына Құдайдың бірлігін уағыздап, Баалуға табынудан бас тартып, бір Аллаға сенуге шақырған. Оның уағызына сенбеген тайпаластары өкінішке ұрынып, І. (ғ.с.) кейінгі ұрпақтар алдында даңққа бөленді. Діни аңыздарға орай І. (ғ.с.) пайғамбар Құдайдың дәргаїындағы құрметке бөленіп, “ажалсыз жан” дәрежесіне жеткен. Ол Қыдыр (ғ.с.) пайғамбармен бірге дүниені кезіп, саяхаттап жүреді, мәңгілік ғұмыр сыйлайтын бұлақ басында болады, Меккеге, Мединеге, басқа да қасиетті жерлерге барып тұрады. Қыдыр атамен айрылысқанда бір-біріне мадақ сөз айтады. Осы сөздерді қайталап айта отырып, ажалды пенделер ұры-қарыдан, өрттен, тасқыннан, улы жылан мен зиянды жәндіктерден сақтана алады. Құранның қысқа мадақтаулар бөлімінде І. (ғ.с.) жөнінде атап өтіп, “біз ұрпақтарға оған құрмет көрсетуді қалдырдық” дейді. І-тың көкке әкетілуі жөніндегі аңыз оны мұсылман әпсанасындағы қайта тірілу мен мәңгілік өмір сүрудің өнегелі үлгісіне, халық нанымындағы танымал тұлғаға айналдырды. [1][2]
[өңдеу] Пайдаланылған cілтемелер
- ↑ Қазақ Энциклопедиясы, 9 том
- ↑ Ислам. Энциклопедиялық анықтамалық. Алматы: “Аруна Ltd.” ЖШС, 2010 ISBN 9965-26-322-1
