Айранбай күмбезі, Айранбайтам, Бескүмбез — сәулет өнері ескерткіші. Ұлытау облысы, Сарыкеңгір өзенінің жағалауында орналасқан. Айранбай күмбезі шамамен 1870 жылы шикі кірпіштен қаланып, іші-сырты күйдірілген қышпен қапталған. Бескүмбезді мавзолейдің жобасы ерекше, айғыш тәрізді пішініне сәйкес төрт жарты сфералы күмбезбен жабылып, солардың үстіне үлкен күмбез орналасқан. Құрылыс өрнегі аса күрделі емес, айналдыра белдеу тартылған. Күмбездің жалпы аумағы 8,30x9,75 м, биіктігі 6 м. Алдыңғы жағы басқаларынан биік, еңселі. Кіретін есік адам бойынан биік, шығыңқы портикпен әшекейленген. Кірер бет маңдайшасында арабша жазуы бар. Айранбай күмбезі — республикалық маңызы бар тарих және мәдениет ескерткіштері тізіміне енгізілген.[1][2]