Асқорыту

Қазақша Уикипедияның мағлұматы

Асқорыту жүйесі – ағзаны қоректік заттармен қамтамасыз ететін органдардың біртұтас жиынтығы. Адамның асқорыту жүйесіндегі өңештің, асқазанның және ішектердің жалпы ұзындығы 8-12 м-дей болады. Асқорыту жүйесіне ауыз қуысы мен оның ішіндегі органдар (тіл, тіс, без), жұтқыншақ, өңеш, асқазан, жіңішке (он екі елі, т.б.) және жуан (соқыр, тоқ, тік) ішектер, бауыр, ұйқы безі, сондай-ақ өт қалтасы кіреді. Ауыз қуысында тістердің көмегімен тамақ ұнтақталып, езіледі, тіл арылы сілекеймен араластырылады. Тамақ ауыз қуысынан жұтқыншаққа, одан кейін өңештен өтіп, асқазанға түседі. Асқазанда тамақ сұйық немесе ботқа тәрізді қоспаға (химус) айналып, онда аз бөлігі сіңіріледі. Iшекте тамақ ұйқы безі мен ішек бездерінің сөлдері және өттің әсерінен одан әрі толық химиялық өңдеуден өтіп майдаланады да, ішек бүрлері арқылы қан, лимфа тамырларына сіңіріледі. Өңделмеген және сіңірілген ас қалдықтары нәжіске айналып, сыртқа шығарылады.