Ақсу-Аюлы

Ақсу-аюлы, ауыл, Шет ауданының және Ақсу-аюлы ауылдық округінің орталығы. Шерубай-Нұра өзенінің аңғарында, Аюлы тауының етегінде, Қарағандының оңтүстік-шығысында 130 км жерде, Астана—Алматы автожолының бойында орналасқан. Іргесі 1930 ж. ұжымдастыру кезеңінде қаланған. Халқының саны — 5,3 мың (2005). Округ атауы 30-60-жылдары Түлкілі ауылдық кеңесі, 1994 ж. Ақсу-Аюлы ауылдық округі болып өзгерген. Округ аумағында 20 ғасырдың 30-жылдарында «Ақсу», «Егіндібұлақ», «Алғабас», «Қызылтау», «Беталыс», «Қатпар», «Игілік», «Сталин», «Еңбекшіл» ұжымшарлары ұйымдастырылған. 1960-1990 ж. Орджоникидзе атындағы кеңшардың және ауылдық кеңес пен аудан орталығы. Шаруашылықтың мамандандырылған негізгі бағыттары — ет, сүт өндіру және қосымша егін салу болды. Жерінің жалпы ауданы - 155,0 мың га. Аудан орталығы мен округтің елді мекендерінде (Ақсу, Ақтөбе, Еңбекшіл, Қайрақты) 30-дан астам аудандық және облыстық бағыныстағы мемлекеттік мекемелер мен кәсіпорындар, 2 орта, 4 бастауыш мектеп, кәсіби мектеп, интернат үйі, аурухана, 4 ФАП, 37 дүкен, 7 асхана, 8 АЗС, мейманхана, 5 жеке меншік монша, 3 шаштараз, 4 жеке меншік дәріхана, жастардын демалу орталығы, кітапхана, мәдениет үйі, ауылдық клуб, мешіт, мұражай, балалар мен жастардың спорт мектебі мен балабақша, басқа да мәдени-тұрмыстық мекемелер бар. Кеңшар негізінде 100 шаруа қожалығы құрылған (2006). Жанқұтты би, Шортанбай жырау ескерткіштері аудан орталығына орнатылып көше атаулары берілген. Ауыл басқа елді мекендермен автомобиль жолдары арқылы байланысады. Ең жақын Жарық темір жол стансасы 70 км жерде.