Ақтау (кент)

АҚТАУ — Қарағанды облысындағы Теміртау қалалық әкімшілігіне қарасты кент. Теміртаудан солтүстікке қарай 18 км, Қарағандының солтүстігінде 57 км жерде орналасқан. Іргесі 1950 жылы Орталық Қазақстан өнеркәсібін құрылыс материалдарымен қамтамасыз етуге байланысты қаланған. 1972 жылы кентке айналған. Тұрғыны 11,9 мың адам (1997). Ақтауда “Қарағандыцемент” өндірістік бірлестігі, асбоцемент бұйымдарын жасау және құрылыс жабдықтарын шығару зауыттары, автокөлік кәсіпорыны жұмыс істейді. Индустрия техникумы, кәсіптік техникалық училище, 2 орта мектеп, мәдениет үйі, кинотеатр, спорт сарайы, стадион, жүзу бассейні, балалар мен жасөспірімдер мектебі, медициналық-санитарлық бөлім, емхана бар. Ақтау Қарағанды-Астана темір жолы, Петровка —Токаревка — Теміртау автомобиль жолы өтеді. Елді мекендермен ауыларалық жолдар арқылы байланысады. ^[1]