Балу

Балу, Бахлу — Ыстықкөл маңында болған ежелгі қаланың тарихи жазбаларда сақталған атауы. Араб географы әл-Мұқаддасидің (946/47 жылы туған — 1000 жылдар шамасында өлген) “Ахсан ат-та-қасим фи марифат әл-ақалим” атты шығармасында (985) тұңғыш рет аталады. Бұл жерлерді өз көзімен көрген автор Балуды “Тараз, Жікіл, Барсхан, т.б. Испиджаб аймағына кіретін шағын қалалардың бірі” дей отырып, “Балу Барсханнан гөрі аумақты, Жікілден солға қарай (яғни солтүстікте) жарты фарсах жерде. Қалада табиғи тастан қаланған бес қоршау, қамал, базар алаңында үлкен мешіт бар” деп сипаттайды. 10 ғасырда Балу өзінің маңызын біраз жоғалтқан болу керек, өйткені 11 ғасырдың ортасында өмір сүрген Махмұт Қашқари Балу “Аргудегі (Тараз өңіріндегі ел) шағын қаланың аты” деп қана көрсеткен. Бұдан кейінгі кезеңдерде араб, парсы жазушылары мен саяхатшылары бұл қаланы атамайды. Оның нақты дәл орны әлі белгісіз. ^[1]