Бақаоты, сукөрік (Hydrocharіs) — сукөріктер тұқымдасына жататын көп жылдық су өсімдіктері. Дүние жүзінде 6, Қазақстанда — кәдімгі Бақаоты (H. morsus ranae) түрі бар. Бақаоты — су бетінде қалқып жүретін ұсақ та әсем шөптесін өсімдіктер. Олар көлде, тынық және баяу ағатын, көбінесе, қалың қамыс, қоға арасында, суда өседі. Аквариумда өсіруге болады. Сабағы көптеген бунақтардан тұрады. Бүтін жиекті, жұмыртқа пішіндес жапырағы сабағына шоғырланып орналасады. Гүлі ақ, үш желекті келеді. Бақаоты көбінесе, өсімді (вегетативті) жолмен, әсіресе, жазда пайда болған жас өскіндерінен көбейеді. Күзде өркендерінің ұшында бүршік пайда болады да, ол үзіліп түсіп, су түбінде қыстайды. Көктемде сол бүршіктер су бетіне қалқып шығып, олардан жаңа өсімдік дамиды. Жемісі — жидек. Бақаотының сабақтарымен, жапырақтарымен су құстары және балықтар қоректенеді. [1]
[өңдеу] Пайдаланылған әдебиет
- ↑ Қазақ энциклопедиясы, 2 том;
