Джонни Депп

Джонни Депп
Johnny Depp
Джонни Депп 2013 жылы
Жалпы мағлұмат
Туған кездегі есімі	Джон Кристофер Депп II
Туған күні	9 маусым 1963 (1963-06-09) (60 жас)
Туған жері	Овенсборо, Кентукки, АҚШ
Азаматтығы	АҚШ
Мамандығы	актер, режиссёр, кинопродюсер
Белсенді жылдары	1984 — қазіргі уақытқа шейін
Марапаттары	Сезар (1999) «Алтын глобус» (2008)
IMDb	ID 0000136

Джон Кристофер «Джонни» Депп II (ағылш. John Christopher «Johnny» Depp II, 1963 жылы 9 маусымда туған) — америкалық актер, продюсер және музыкант. Ол Үздік актер санатында «Алтын глобус» және «Америка киноактерларының гильдиясы» марапаттарын жеңіп алған. Депп 1980 жылдардағы «Джамп стрит,21» телевизиялық топтамасында атақты бола бастап, тез арада жасөспірімдер арасындағы жұлдызға айналды. Фильмдерге бет бұрғаннан кейін ол «Эдвард қайшы қолдар» (1990) фильміндегі бас кейіпкер ретінде әйгілі болды, ал кейінірек ол «Ұйқылы алқап»(1999), «Чарли және шоколад фабрикасы»(2005), «Кариб теңізінің қарақшылары фильмдер сериясында» (2003-тен бері қарай) және "Ранго" сияқты фильмдерде кассалық жинақ табыстарына жетті. Ол режиссер әрі жақын досы Тим Бёртонмен бірге 2006 жылы "Оскар" сыйлығына "Үздік анимациялық фильм" санатында номинация алған "Келіншектің мәйіті" атты бір анимациялық фильмде және жеті көркем фильмде жұмыс жасады, олардың ішінде ең беріректе түсірілгені – «Қара көлеңкелер» (2012).

Депп «Эд Вудта» кіші Эдвард Д.Вуд, «Донни Браскода» Джозеф Д. Пистоне, «Лас-Вегастағы үрей мен жек көрушілікте» Хантер С.Томпсон және «Кокаинде» Джордж Джанг, 2009 жылғы Майкл Манның «Қоғам жаулары» атты фильмінде банктерді тонаушы Джон Диллинджер сияқты шынайы тұлғаларды сомдағаны үшін құрметке ие болды.

Депп ойнаған фильмдер АҚШ кино кассасында $3.1 миллиард және әлемдік кинокассада $7.6 миллиард жинады. Ол жоғары дәрежедегі марапаттарға бірнеше мәрте ұсынылған; ол «Суини Тодд: Флит-стриттегі әзәзіл шаштараздағы» рөлі үшін «Алтын глобус» және «Кариб теңізінің қарақшылары: Қара маржан қарғысы» фильміндегі рөлі үшін «Америка киноактерларының гильдиясынан» Үздік актер марапаттарын жеңіп алды. Сонымен бірге ол People журналымен екі рет - 2003 және 2009 жылы Әлемдегі ең тартымды ер адам ретінде танылып, америкалық кинематографта секс-символ мәртебесіне ие болған. Ол 2012 жылғы Гиннесс рекордтар кітабында $75 миллионмен ең жоғары ақы алатын актер ретінде көрсетілді.

Ерте жылдары

Балалық шағы

Депп Оуенсборо, Кентукки штатында, қоғамдық инженер Джон Кристофер Депп және даяшы Бетти Сью Палмердің (қыз кезінде Уеллс) отбасында дүниеге келген. Оның Дэниел есімді жазушы ағасы және екі әпкесі бар – Кристи (қазір өзінің жеке менеджері) мен Дебби. Депптің ата-тегінде француз, неміс, үндіс және ирланд қаны бар. Өмірбаяндарға сүйенсек, АҚШ-тағы Депптер отбасы өз бастауын 1700 жыл шамасында Вирджиния штатындағы Джеймс өзенінен жоғарырақта орналасқан босқындар колониясында қоныс тепкен француз гугенот иммигранты Пьер Деппе немесе Диеппеден алады. Актер 2011 жылы өзінде америкалық үндістер қаны бар екенін: "Мен өзімде америкалық үндістердің қаны бар деп есептеймін. Менің арғы әжемде олардан кішкене болған, чероки әлде крик үндістерінен болу керек. Ол Кентуккиден болғандықтан бұл шындыққа жақын, себебі онда негізінен осы тайпалар мекен еткен", - деп айтып көрсетті.

Депптің балалық шағында оның отбасы жиі қоныс аударып отырған, ол бауырларымен бірге жиырмадан астам тұраққа қоныс аударып, ақыры Флорида штатындағы Мирамарда 1970 жылы тұрақтаған. 1978 жылы Депптің ата-анасы ажырасады. Бала кезінде ол отбасы мәселелерінен пайда болған стресстің әсірінен өз-өзін жарақаттаумен айналысуға бейім болған. Оның денесінде осы әдетінен қалған жеті не сегіз тыртығы бар. 1993 жылы берген сұхбатында ол өз-өзін жарақаттауын былайша түсіндірді: «Менің денем өмір жолымдағы журнал іспеттес. Бұл бұрынғы кездегі теңізшілердің істегені сияқты, өзіңе бір белгі салған кезде оны өзің пышақпен салдың ба әлде татуировка маманы салды ма, әр татуировка бір мағынаны білдіреді, өміріндегі ерекше бір кезеңді».

1980 жылдар

Джонни Депп 1992 жылғы Канн кинофестивалінде

12 жасында анасы сыйлаған гитарамен Депп әр түрлі гараж топтарында музыка ойнай бастады. Оның алғашқы тобы кездесіп жүрген қызы Мередиттің құрметіне болды. Ата-анасы ажырасқаннан кейін бір жылдан соң Депп рок-музыкант болу үшін мектепті тастап кетеді. «Актерлар студиясында» бағдарламасында айтқанындай, ол екі аптадан соң мектепке қайтып келеді, бірақ мектеп директоры оған музыкант боламын деген арманына жетуін тілеп,шығарып салады. Ол «The Kids» атты жергілікті аймақта кішігірім табысқа жеткен топта ойнайды. «The Kids» өз атауын «Six Gun Method» деп өзгертіп, таспа жасау келісім-шартына қол жеткізу мақсатында Лос-Анджелеске аттанады, бірақ топ мақсатына жетпей тұрып бөлініп кетеді. Нәтижесінде Депп «Rock Сity Angels» тобымен бірге ойнап, кейін осы топтың Джеффен Рекордз үшін дебютінде «Жас жігіттің блюзі» деген атпен пайда болған «Mary» деген әнін бірге жазысады.

1983 жылы 24 желтоқсанда Депп грим жасаушы және топтың бас-гитарашысы әрі әншісінің әпкесі Лори Энн Эллисонға үйленеді. Некеде тұрған кезінде оның жұбайы грим жасаушы болып, ал өзі телефон арқылы қаламсап сату сияқты әр түрлі қызық жұмыстармен шұғылданады. Оның әйелі оны Николас Кейджбен таныстырады, ал ол Деппке актерлікпен айналысуға кеңес беріп, өз агентімен таныстырып, Депптің «Қарағаштар көшесіндегі сұмдық» фильміндегі алғашқы рөлін алуға көмектеседі. Депп әйелімен 1986 жылы ажырасады. Кейінірек ол Шерилин Феннмен кездесе бастайды және онымен атастырылады (екеуі 1985 жылғы «Қуыршақтар» (Dummies) қысқаметражды фильмінің түсірілімінде танысқан болатын).

Мансап жолы

Телевизиядағы уақыт

Депп 1987 жылы тұсауын кескен Fox телеарнасының «Джамп стрит, 21» атты телетоптамасында басты рөлді ойнайды. Депп бұл рөлде ойнауға өзіне шығармашылық шабыт берген актер Фредерик Форрестпен бірге жұмыс жасау үшін келісімін береді. Депптің ұзақ уақыттан бергі досы Саль Дженко "Блоуфиш" атты қоқыс жинаушының рөлінде телетоптамаға келеді. Телетоптаманың сәтті болып шығуы Деппті 1980 жылдардың соңындағы жасөспірімдердің сүйікті жұлдызына айналдырады. Ал уақыт өте келе ол өзін осы рөлде "студияның өнімі" ретінде сезіне бастайды. Осыдан соң Депп тек өзіне ұнайтын, өзіне дұрыс деп көрінген фильмдерде ғана ойнауға шешім қабылдайды. Депп өзінің топтамадағы әріптестері Питер де Луис, Холли Робинсондармен бірге 2012 жылғы оның комедиялық ремейк ретіндегі көркем фильмінде өз рөлдерін эпизодта қайта сомдады.

Фильм рөлдері

Джонни Депп 2011 жылы сәуір айында

Депптің ең алғашқы фильм рөлі 1984 жылғы «Қарағаштар көшесіндегі сұмдық» қорқынышты фильмінде болды. Онда ол басты кейіпкер қыздың жігітін және Фредди Крюгердің құрбандарының бірін ойнайды. 1986 жылы Оливер Стоунның «Взвод» фильмінде вьетнамша сөйлей алатын қатардағы солдаттың кішігірім рөлінде көрінеді. 1990 жылы Тим Бёртонның «Эдвард қайшықолдар» фильмінде басқалардан ерекшеленетін, қолының орнына қайшылары бар жас жігіт Эдвардтың рөлін ойнауды өз мойнына алады. Дегенмен, фильм халықтың ыстық ықыласына бөленіп, Депп алғаш рет «Алтын глобус» марапатына номинация алады. Фильмнің сәттілігі оның Бёртонмен арадағы ұзаққа созылған достық әрі қызметтік қарым-қатынасына бастау береді.

Америкалық танымал журналист әрі жазушы Хантер С.Томпсонның шығармашылығының табынушысы әрі оның ұзақ уақыттан бергі досы Депп, жазушының фильммен аттас псевдоөмірбаяндық романына негізделген 1998 жылғы «Лас-Вегастағы үрей мен жек көрушілік» фильмінде Томпсонның Рауль Дьюк атты бір кейпін сомдады. Депп автордың соңғы кітап турларының бірінде Томпсонмен бірге оның жол менеджері ретінде жүрді. 2006 жылы Депп ammobooks.com басып шығарған «Гонзо: Хантер С.Томпсон түсірген фотосуреттер» атты жазушының қайтыс болғаннан кейінгі өмірбаянына кіріспе сөз жазды. Депп отшашулар мен Томпсон өмір сүрген Колорадо штатындағы Аспендегі Томпсонның күлін зеңбірекпен атуды қосқанда, Томпсонды еске алу құрметіне ұйымдастырылған шараларға кеткен шығынның көп бөлігін өзі көтерді. Ол Томпсонның шығармашылығына оның Ром күнделігі атты романының 2011 жылғы фильм нұсқасымен қайта оралды

Кино сыншылары Депптің рөлдерін «әйгілі жалғызжан кейіпкерлер» деп сипаттады. Депп өз мансабының бұл кезеңін «студиялар орнатқан сәтсіздіктер» мен «кинокассаның уы» болған фильмдерге толы болғанын, бірақ ол студиялар бұл фильмдерді ешқашан да түсінбеген және оларды жарнамалауды тиісті дәрежеде жүргізбеген деп ойлағанын атап көрсетеді.

Лондондағы мадам Тюссо балауыз мүсіндер мұражайындағы Джек Торғайдың мүсіні(2011 жыл)

2003 жылы Уолт Диснейдің «Кариб теңізінің қарақшылары: «Қара Маржан» қарғысы» фильмі өте сәтті шықты, онда Депптің тартымды қарақшы - капитан Джек Торғай ретіндегі жетекші рөлі жоғары бағаланды. Студия басшылары алғашында оған сенімсіздікпен қарады, алайда бұл кейіпкер киноға барушы халық арасында танымалдылыққа ие болды. Fandango сайты жүргізген зерттеуге сәйкес, көрермендердің бұл фильмге қызығушылығына Депп басты себеп болған. Фильм режиссері Гор Вербински Депптің бұл кейіпкері актердың өзіне көбірек ұқсайды десе, Депп бұл кейіпкерді «Роллинг Стоунз» тобының гитаристі Кит Ричардздан қарап, жасап шығардым дейді(кейін Кит Ричардз «Кариб теңізінің қарақшылары: Әлемнің қиырында» деп аталатын триквелде Джек Торғайдың әкесі капитан Тигтің рөлін сомдайды). Осы рөлі үшін Депп алғаш рет Үздік актер санатында «Оскар» сыйлығына номинация алады. 2004 жылы ол «Ғажайыптар елі» фильмінде Питер Пэнді ойлап тапқан шотландық жазушы Дж.М.Барриді сомдағаны үшін екінші рет Үздік актер санатында «Оскар» сыйлығына номинация алады. Депптің келесі басты рөлі 2005 жылғы «Чарли және шоколад фабрикасы» фильміндегі Вилли Вонка болды. Бұл фильм кинокассада ірі табысқа жетіп, оған «Мюзикл немесе комедиядағы үздік актер» санатында «Алтын глобус» номинациясын әкеледі.

Депп Джек Торғай рөліне 2006 жылы 7 шілдеде тұсауын кесіп, АҚШ көрсетілімдерінде алғашқы үш күнде $135,5 миллион ақша жинап, демалыс күндеріндегі ең жоғары кинокасса рекордын жаңартқан «Кариб теңізінің қарақшылары: Өлген адамның сандығы» сиквелінде қайта оралады. Кариб теңізі қарақшыларының келесі сиквелі – «Әлемнің қиырында» 2007 жылы 24 мамырда жарыққа шықты. Депп Джек Торғай рөлінде «өз жанының үлкен бөлігі» бар екенін және де келесі сиквелдерде осы рөлін қайта ойнағысы келетінің айтқан. Депп Джек Торғайды «Кариб теңізінің қарақшылары: Джек Торғай хикаясы» видеоойынында дыбыстады. Джонни Депптің керемет қылыштасу өнері (Джек Торғай рөлі үшін арнайы үйренген) “Reclaiming the Blade” деректі фильмінде ерекше аталып көрсетіледі. Фильмде қылыштасу шебері Боб Андерсон өзінің «Қара Маржан қарғысындағы» Деппен хореография бойынша жасаған жұмыс тәжірибесімен бөлісті. Голливудтың тағы бір өз уақытында атағы шыққан қарақшысы Эрол Флиннді жаттықтырған Андерсон Депптің фильмдегі актер ретінде қылышты алып жүру қабілетін «адам бір нәрсені қаншалықты дәрежеде үйрене алса, сондай дәрежеде жақсы» деп түсіндірді.

2007 жылы Депп Тим Бёртонның «Суини Тод» мюзиклін фильмге ыңғайластыруында басты рөлде ойнады. Бұл рөлінде Депп алғаш рет бүкіл фильм бойы ән орындауына тура келді. Осы рөлі үшін ол үшінші рет "Оскар" сыйлығына номинация алып, «Мюзикл немесе комедиядағы үздік актер» санатында «Алтын Глобусты» жеңіп алды. Депп Голливудтың шетелдік баспасөз ассоциациясына алғысын білдіріп, Тим Бёртонға «зор сенімі мен көрсеткен демеуі» үшін жоғары баға берді.

2009 жылы Депп «Доктор Парнастың қиял әлемі» фильмінде марқұм Хит Леджердің бұрынғы кейіпкерін Джуд Лоу, Колин Фаррелдермен бірге ойнап бітірді. Үш актер де өздерінің фильмнен алған жалақыларын Леджердің қызы Матильдаға берді. 2010 жылы ол Бёртонның «Алиса ғажайыптар елінде» фильмінде Ессіз қалпақшыны ойнады. Сонымен бірге Анджелина Джолимен бірге «Турист» фильміне түсіп, осы екі рөлі үшін де «Мюзикл немесе комедиядағы үздік актер» санатында «Алтын Глобус» номинацияларына ұсынылды.

2011 жылы ол 3 фильмде басты рөлді сомдады: Гор Вербинскидің 2012 жылғы "Үздік анимациялық фильм" санатында "Оскар" сыйлығына ие болған "Ранго" атты анимациялық фильмінде Ранго деген басты кейіпкер хамелеонды өз даусымен сөйлетсе, «Кариб теңізінің қарақшылары: Бейтаныс жағалауда» фильмінде капитан Джек Торғай рөлінде және жазушы Хантер С. Томпсонның «Ром күнделігі» атты кітабының фильм нұсқасында продюсер әрі бас кейіпкер Пол Кемп рөлінде көрінді.

2007 жылы Депп Warner Bros. студиясының 1966-1971 жылдары америкалық ABC арнасында көрсетілген готикалық телетоптама «Қара көлеңкелерден» фильм жасауға деген ұсынысын қабыл алып, топтамамен аттас фильмде басты рөлді сомдады. Бұл фильмге Грэм Кингпен бірге Депп өзі продюсер болды. Қазіргі уақытта ол Дисней студиясының тағы бір фильмі «Жалғыз рейнджерде» бас кейіпкердің жолдасы үндіс Тонтоның рөлінде түсті, бұл фильм оны "Кариб теңізінің қарақшылары" және "Рангоның" режиссері Гор Вербинскимен тағы да табыстырды.

Жуық арада Депптің жаңа жобалары анықталды. Осы жылдың сәуір айында ол Кристофер Ноланның барлық фильмдерінде оператор болған Уолли Пфистердің "Үстемділік" атты режиссерлық дебютында басты рөлді сомдайтыны белгілі болды. Сонымен қатар режиссер Барри Левинсонның АҚШ-тың атақты гангстері,ирланд мафиясын басқарған Уайти Булджер туралы "Қара месса" атты фильмінде бас кейіпкердің рөлін сомдамақ. Және де "Кариб теңізінің қарақшылары-5" түсірілуге дайындық сатысында, Дисней студиясы атақты фильмдер сериясының бесінші бөлімі 2015 жылы жарық көретінін жариялады.

Тим Бёртонмен бірлестігі

Депп режиссер әрі өзінің жақын досы Тим Бёртонмен жеті фильмде бірлесіп жұмыс істеді. Олардың ішінде ең алғашқысы - Уайнона Райдер және Винсент Прайспен бірге ойнаған «Эдвард қайшықолдар»(1990) болатын. Бёртондағы оның келесі рөлі – 1994 жылғы «Эд Вуд» фильмі болды. Депп кейін былай деді: «Жоба туралы естігеннен 10 минут ішінде мен рөлге бекітілдім». Ол уақытта актер фильмдер мен оларға түсу жайында беймаза халде жүрген болатын. Ал бұл рөл оған «бой жазып, аздап көңіл көтеруге» мүмкіндік берді және Мартин Ландаумен бірге жұмыс істеу оның актерлыққа деген махаббатын қайта оятты. Продюсер Скот Рудин бірде «Джонни Депп Тим Бёртонның барлық фильмдерінде оның өзін ойнайды» деген болатын, әйткенмен Тим Бёртон бұл сөздерді жоққа шығарды. Дегенмен, Депп Рудиннің айтқанымен келіседі. Депптің айтуы бойынша, «Эдвард қайшықолдар» Тим Бёртонның жасөспірім шағындағы ұяңдығын көрсетеді. Ал «Эд Вуд» Бёртонның Винсент Прайспен арақатынасын көрсетеді (кіші Эдвард Д.Вуд пен Бела Лугошидікіне ұқсас).

Депп пен Бёртонның келесі жобасы – «Ұйқылы алқап» (1999) болды, онда ол Кристина Риччимен бірге Икабод Крэйннің рөлінде ойнады. Бұл фильм Тим Бёртонның Голливудтағы студиялық жүйемен шайқасын тұспалдап көрсетеді. Өзінің кейіпке енуі үшін Депп Анджела Лансбери, Родди МакДоуал және Бэйзил Рэтбоуннан шабыт алды. Депп: «Әрдайым Икабод туралы қорқып қалған кішкене қыз сияқты, әйелдік жағы басымырақ, өте сыпайы, нәзік жан ретінде ойлайтынмын», - деп айтқан болатын. Осыдан соң Депп шоколад фабрикасының егесі Вилли Вонканы ойнаған 2005 жылғы «Чарли және шоколад фабрикасына» дейін Тим Бёртонмен бірге жұмыс жасамады. Депп осы кейіпкерінің шаш үлгісін Анна Винтурдікіндей етіп алады. Фильм кинокассада сәттілікке қол жеткізді және сыншылардан оң бағалар алды. Ал 1971 жылғы фильмде Вилли Вонканы сомдаған Джин Уайлдер бұл нұсқаны жөн көрмеді. «Чарли және шоколад фабрикасы» шілдеде жарыққа шықты, онан соң қыркүйекте «Келіншектің мәйіті» анимациялық фильмінде Депп Виктор Ван Дорт есімді кейіпкерді өз даусымен сөйлетті.

Келесі фильм - Деппке өміріндегі екінші ірі марапат «Алтын глобус» пен «Оскарға» үшінші номинацияны алып келген «Суини Тодд: Флит Стриттегі әзәзіл шаштараз» болды. Алғаш рет Тим Бёртон оған 1979 жылғы мюзикл таспасын 2000 жылы берген еді. Мюзикл жанрына аса қызықпаса да, Деппке әңгіме желісі ұнап қалады. Ол рөлге басты ықпал ретінде 1935 жылғы «Ессіз махаббат» қорқынышты фильміндегі Питер Лорды алғанын атап көрсетті және кейіпкері айтатын әндерді «Кариб теңізінің қарақшылары: Әлемнің қиырында» түсірілімі кезінде айтып жаттықты. Бұрын музыкалық топтарда ән айтқанына қарамастан, Депп шындығында Стивен Сондхэймнің өлеңдеріне әлі жететініне сенімсіз еді. Депп демолар жазып, арнайы ұстаздың көмегінсіз өз вокалын шыңдау мақсатында Брюс Уиткинмен жұмыс жасады. “Entertainment Weekly” журналының DVD Reviews бөлімінде Крис Нашавати фильмге А- бағасын беріп: «Депптің жоғарылап бара жатқан даусы адамдарды оның келесіде қандай сұмдыққа баратынына алаңдатады. Шаштараз Депп қолындағы ұстараға қарап отырсаң, 18 жыл бұрын Эдвард қайшықолардың ағаштарды жануарлар бейнесіне келтіре қырқып жатқанын еске алмау мүмкін емес және Бёртон мен Депп ешқашан кездеспегенде біз айырылуымыз мүмкін болған ерекше әдемілік туралы ойлайсың»,- деп жазды.

«Burton on Burton» атты режиссермен сұхбаттар кітабына жазған кіріспе сөзінде Депп Бёртонды «ағам, досым және батыл жан» деп атады. Келесі Депп-Бёртон бірлестігі «Алиса ғажайыптар елінде»(2010) болды.Депп онда Ессіз қалпақшы рөлінде Хелена Бонэм Картер, Энн Хэтэуэй және Алан Рикманмен бірге ойнады. 2012 жылы ол Бёртонның 1966-1971 жылдардағы фильммен аттас топтамаға негізделген "Қара көлеңкелер" атты фильміне Хелена Бонэм-Картер, Мишель Пфайфер және Ева Гринмен бірге түсіп, басты рөлді сомдады.

Жеке өмірі

Жұбайы Лори Энн Эллисонмен ажырасқаннан кейін Депп актрисалар Шерилин Фенн, Дженифер Греймен қысқа уақытты қарым-қатынаста болады.Ал 1989 жылы "Үлкен от шарлары" фильмінің тұсаукесері кезінде актриса Уайнона Райдермен танысып, 2 айдан соң екеуі кездесе бастайды.1990 жылдың шілдесінде ол Уайнонамен атастырылады. 1994 жылдан бастап Депп британдық супермодель Кейт Мосспен жүре бастайды. Сол жылы ол Нью-Йорктегі отельдің люкс-бөлмесін қиратып, айтарлықтай шығын келтіргені үшін полициямен қамауға алынып, тергеледі. 1998 жылдан бері Депп «Тоғызыншы қақпа» фильмінің Франциядағы түсірілімі кезінде танысқан француз әншісі әрі актрисасы Ванесса Парадимен жақын қарым-қатынаста болып келді. Ол 1999 жылы Лондонда Паради екеуі кешке тамақтанып отырғанында ресторанның сыртында папараццимен қақтығысқаны үшін тағы да қамауға алынады. Айлар бойы бұқаралық ақпарат құралдарының пайымдауларынан соң екеуі 2012 жылдың маусым айында айырылысқандарын жария етті.

Депп пен Парадидің 2 баласы бар: 1999 жылы 27 мамырда дүниеге келген қызы Лили-Роуз Мелоди Депп және 2002 жылы 9 сәуірде туған ұлы Джон Кристофер «Джек» Депп III. 2007 жылы оның қызы қатты науқастан жазылып шықты, E.Coli инфекциясы оның бүйрегінің істемей қалу каупін туғызып, ұзақ уақыт Лондонда ауруханада жатты. Депп Суинни Тодд фильміндегі жұмысын тоқтата тұрып,қызы жазылғанша өзі жанында болды. Осы Great Ormond Street ауруханасына 2007 жылдың қараша айында толық капитан Джек-Торғай костюмімен келіп, 4 сағат бойы науқас балаларға ертегілер оқып берді. Кейінірек ол 2008 жылдың басында госпитальға £1 миллион ($2 миллион шамасында) алғыс ретінде тарту етті.

Депп қайтадан заңды түрде үйленбесе де, ол балалы болу оған «өмірде, жұмыста, барлық тұрғыда нағыз тірек, шынайы тұрақтылық» бергенін айтады. «Сен балаларыңа деген терең махаббатты жоспарлай алмайсың. Әке болу саналы түрдегі шешім емес. Ол менің керемет саяхатымның бір бөлігі болды. Бұл – тағдыр. Ақыры тағдырдың есебі бәрін шешті», - дейді Депп. Депптің отбасы өз өмірлерін Париж маңындағы Мёдон аумағындағы, Лос-Анджелестегі үйлерінде, Багам аралдарындағы жеке меншік шағын аралда және Францияның оңтүстігіндегі Сан-Тропеден 20 километр қашықтықтағы Ле План-де-ла-Турдағы вилласында өткізеді. Және де 2007 жылы Депп Ле План-де-ла-Тур аймағынан жүзімдік сатып алды.

Депптің денесінде 20 шақты татуировка бар, олардың көбісі оның өміріндегі маңызды адамдарды немесе оқиғаларды суреттейді. Олардың арасында ерекше атап өтетіндері – оң қолының қарында - Үндіс көсемінің басы (оның тегінде үндіс тайпасы черокидің қаны бар) және «Wino Forever» жазуы бар жолақ (басында «Winona Forever» болған, Уайнона Райдермен айырылысқаннан соң өзгертілген), жүрек тұсының жоғарғы жағында - «Lily-Rose»(қызының есімі), сол қарында - «Betty Sue»(анасының есімі) және оң білегінде - су үстінде ұшып бара жатқан торғай мен «Jack» сөзі (ұлының есімі; Кариб теңізі қарақшыларындағыдай өзіне қарай емес,өзінен тысқары ұшып бара жатқан торғайдың суреті).

2010 жылы 8 қазанда Депп күтпеген жерден Кариб теңізі қарақшылары фильмінің төртінші бөлімін түсіріп жатқан жерге жақын маңдағы Лондон бастауыш мектебіне өз сыныбында көтеріліс жасауға көмек сұраған оқушы қыздың хатын алғаннан соң өзінің кейіпкері Джек Торғай болып киініп келеді.

Өзге қызығушылықтары

Музыка

1980 жылдары Депп "The Kids" рок-тобының мүшесі болып,бас гитарада ойнаған. 1993 жылы "P" тобын құруға ат салысып,сонда гитарада ойнады. Гитарашы ретінде ол жеке альбом жаздырған, "Оазис" тобының бірнеше әндеріне слайд-гитарамен сүйемелдеу жасаған. Сонымен қатар өзі басты рөлдердің бірін сомдаған "Шоколад" фильмінде бірқатар тректерді акустикалық гитарада өзі ойнаған, ал "Бір жолы Мексикада: Жанкешті-2" фильмінің саундтрэгі үшін өзінің кейіпкері Сэндзге арналған "Sand's Theme" трегін шығарып,өзі гитарада ойнаған. Депп "Tom Petty & The Heartbreakers" тобының Into The Great Wide Open(1991) әнінің видеоклипіне, "Lemonheads" тобының It's a shame about Ray(1992) видеоклипіне түскен.

Шарап жасаушы және ресторатор

1993-2004 жылдары Депп Калифорниядағы Батыс Голливудта Сансет гүлзарында орналасқан "The Viper Room" түнгі клубының бір бөлігінің иесі болған. Сонымен бірге Джон Малкович, Шон Пенн,Мик Хакноллдармен бірге Париждегі Елисей алаңындағы Man Ray ресторанына иелік еткен.Депп серігі Ванесса Паради екеуі жүзім өсірумен шұғылданады, олардың Сан-Тропенің солтүстігінде орналасқан План-де-ла-Турда шарап жасайтын қондырғылары бар. Ол француз шараптарына деген ықыласымен белгілі, ең сүйікті шараптарына Бордо шарабының Château Calon-Ségur, Château Cheval Blanc, Château Pétrus және Бургунд шарабының Domaine de la Romanée-Conti түрлері жатады. Депп "Мадам Фигаро" газетіне берген сұхбатында: "Бұл шараптармен нирванаға жетесің", - деп айтқан болатын.

Режиссер және продюсер

1997 жылы Канн фестивалінде Депптің режиссерлық дебюті "Батыл" фильмі алғаш рет көрсетілді. Онда оның жақсы досы әрі ұстазындай болған атақты актер Марлон Брандо кішігірім рөлде көрінеді, ал Депп өзі басты кейіпкер үндіс Рафаэльді ойнайды. Фильм АҚШ-та салқын қабылданғанымен, Депп "Алтын пальма бұтағына" Үздік актер номинациясын алады. Ол серігі Ванесса Парадидің бірнеше клипіне режиссерлық жасаған. Жақында ол британдық "Babybird" тобының "Unloveable" әніне түсірген клипі үшін Independent Music Video Awards марапатына үздік режиссер ретінде ие болды. Қазіргі уақытта Депп атақты гитарист әрі өзінің жолдасы Кит Ричардз туралы деректі фильм түсіруде.

2004 жылы Депп Infinitum Nihil (Абсолюттік ештеңе) продюсерлік компаниясын ашты. Қазір осы компанияның басшысы болып табылады, ал әпкесі Кристи Дембровски онда президент қызметін атқарады. Компанияның алғашқы өнімі 2011 жылғы "Ром күнделігі" фильмі болды. Сонымен қатар, 2011 жылы Мартин Скорсезенің "Хьюго" атты фильмін жарыққа шығаруға ат салысты. Ал 2012 жылы Тим Бёртонның "Қара көлеңкелер" фильмі жарық көрмек.

Марапаттары мен номинациялары

Депптің Голливуд даңқ аллеясындағы 1999 жылы 19 қарашада алған жұлдызы

Депп өзінің 20 жылдан астам актерлық мансабында көптеген марапаттарға ие болған.Олардың ішінде Лондон киносыншыларынан – London Film Critics Circle (1996), Ресей киносыншылары гильдиясынан (1998), Америка киноактерларының гильдиясынан (2004) марапаттар және Үздік актер санатында Алтын глобус бар. 2008 жылғы MTV киножүлделерінен (MTV Movie Awards) Суини Тодд рөлі үшін Үздік зұлым кейіпкер марапатын және Джек Торғай рөлі үшін Үздік комедиялық орындау марапаттарын жеңіп алды. Депп Оскарға үш рет ұсынылған, 2004 жылы Кариб теңізінің қарақшылары: Қара маржан қарғысы үшін, 2005 жылы Ғажайыптар елі үшін және 2008 жылы Суини Тодд: Флит Стриттегі әзәзіл шаштараз үшін. Депп Алтын глобусқа 10 рет ұсынылып, ақырында 2008 жылы Суини Тоддты сомдағаны үшін өзінің алғашқы Алтын глобусына ие болды.

Фильмографиясы

Актер

Жылы	Қазақша атауы	Негізгі атауы	Кейіпкері
1984	Қарағаштар көшесіндегі сұмдық	A Nightmare on Elm Street	Глен Лантц
1985	Жеке курорт	Private Resort	Джек Маршалл
1986	Взвод	Platoon	әскери аудармашы Гейтор Лернер
1990	Жылауық	Cry-Baby	Уэйд "Жылауық" Уокер
1990	Эдвард қайшықолдар	Edward Scissorhands	Эдвард қайшықолдар
1991	Фреддидің өлімі: Ақырғы сұмдық	Freddy's Dead: The Final Nightmare	Опра Нуддлмантра (эпизодта)
1993	Гилберт Грэйпті не алаңдатады?	What's Eating Gilbert Grape	Гилберт Грэйп
1993	Бенни мен Джун	Benny & Joon	Сэм
1993	Аризона арманы	Arizona Dream	Аксель Блэкмар
1994	Эд Вуд	Ed Wood	Эдвард Д.Вуд кішісі
1995	Соңғы сәтте	Nick of Time	Джин Уотсон
1995	Өлі адам	Dead Man	Уильям Блэйк
1995	Дон Жуан де Марко	Don Juan DeMarco	Дон Жуан/Джон Р. де Марко
1996	Канн адамы	Cannes Man	Өзі
1997	Донни Браско	Donnie Brasco	Донни Браско/Джозеф Д.Пистоне
1997	Батыл	The Brave	Рафаэль
1998	Лас-Вегастағы үрей мен жек көрушілік	Fear and Loathing in Las Vegas	Рауль Дьюк
1998	Лос Анжелес картасыз	L.A. Without a Map	Өзі/Уильям Блэйк (эпизодта)
1999	Ұйқылы алқап	Sleepy Hollow	Икабод Крэйн
1999	Ғарышкердің әйелі	The Astronaut's Wife	Спенсер Армакост
1999	Тоғызыншы қақпа	The Ninth Gate	Дин Корсо
2000	Шоколад	Chocolat	Ру
2000	Түн жамылып түскенше	Before Night Falls	Бон Бон/Лейтенант Виктор
2001	Тозақтан келген хат	From Hell	Фредерик Эбберлайн
2001	Жылаған адам	The Man Who Cried	Чезар
2001	Кокаин	Blow	Джордж Джанг
2003	Бір жолы Мексикада: Жанкешті-2	Once Upon a Time in Mexico: Desperado 2	Шелдон Джеффри Сэндз
2003	Кариб теңізінің қарақшылары: Қара маржан қарғысы	Pirates of the Caribbean: The Curse of the Black Pearl	Капитан Джек Торғай
2004	Мәңгілікке бақытты	Happily Ever After	Бейтаныс адам - L'inconnu (эпизодта)
2004	Ғажайыптар елі	Finding Neverland	Джеймс М.Барри
2004	Құпия терезе	Secret Window	Морт Рэйни
2005	Бұзылған адам	The Libertine	Джон Уилмот, Рочестердің екінші графы
2005	Чарли және шоколад фабрикасы	Charlie and the Chocolate Factory	Вилли Вонка
2005	Келіншектің мәйіті	Corpse Bride	Виктор Ван Дорт (дыбыстау)
2006	Кариб теңізінің қарақшылары: Өлген адамның сандығы	Pirates of the Caribbean: Dead Man's Chest	Капитан Джек Торғай
2007	Кариб теңізінің қарақшылары: Әлемнің қиырында	Pirates of the Caribbean: At World's End	Капитан Джек Торғай
2007	Суини Тодд: Флит-стриттегі әзәзіл шаштараз	Sweeney Todd: The Demon Barber of Fleet Street	Суини Тодд/Бенджамин Баркер
2009	Қоғам жаулары	Public Enemies	Джон Диллинджер
2009	Доктор Парнастың қиял әлемі	The Imaginarium of Doctor Parnassus	Тони (бірінші өзгеруі)
2010	Алиса ғажайыптар елінде	Alice in Wonderland	Ессіз қалпақшы
2010	Турист	The Tourist	Фрэнк Тюпело
2011	Ранго	Rango	Ранго (дыбыстау)
2011	Кариб теңізінің қарақшылары: Бейтаныс жағалауда	Pirates of the Caribbean: On Stranger Tides	Капитан Джек Торғай
2011	Ром күнделігі	The Rum Diary	Пол Кемп
2011	Джек пен Джил	Jack & Jill	эпизодта,өзі ретінде
2012	Джамп стрит,21	21 Jump Street	эпизодта
2012	Қара көлеңкелер	Dark Shadows	Барнабас Коллинз
2013	Жалғыз рейнджер	The Lone Ranger	Тонто
2014	Қара месса	Black Mass	Уайти Булджер
2014	Үстемділік	Transcendence	Уилл
2015	Кариб теңізінің қарақшылары-5	Pirates of the Caribbean 5	капитан Джек-Торғай

Режиссер

Жылы	Қазақша атауы	Негізгі атауы
1992	Қоқыс (қысқаметражды деректі фильм)	Stuff
1997	Батыл	The Brave
2011	Кит Ричардз туралы деректі фильм	Keith Richards Documentary

Сценарист

Жылы	Қазақша атауы	Негізгі атауы
1997	Батыл	The Brave

Продюсер

Жылы	Қазақша атауы	Негізгі атауы	Қосымша мәлімет
2011	Ром күнделігі	The Rum Diary
2011	Хьюго	Hugo
2012	Қара көлеңкелер	Dark Shadows

Деректі фильмдері

Жылы	Қазақша атауы	Негізгі атауы	Кейіпкері
1999	Қайнаркөз	The Source	Джек Керуак
2002	Ла Манчада адасқандар	Lost in La Mancha	Өзі (титрде көрсетілмеген)
2006	Тұңғиық теңіз 3D	Deep Sea 3D	Әңгімелеуші
2007	Арманға ұмтылу	Runnin’ Down a Dream	Өзі
2008	Гонзо: Доктор Хантер С.Томпсонның өмірі мен жұмысы	Gonzo: The Life and Work of Dr. Hunter S. Thompson	Әңгімелеуші
2010	Сен басқаша болғанда	When You're Strange	Әңгімелеуші

Музыка

Жылы	Қазақша атауы	Негізгі атауы	Әуендер
2000	Шоколад	Chocolat	"Minor Swing", "They're Red Hot", "Caravan"
2003	Бір жолы Мексикада: Жанкешті-2	Once Upon a Time in Mexico: Desperado 2	"Sands' Theme"
2007	Суини Тодд: Флит-стриттегі әзәзіл шаштараз	Sweeney Todd: The Demon Barber of Fleet Street	"No Place Like London", "My Friends", "Pirelli's Miracle Elixir", "Pretty Women", "Epiphany", "A Little Priest", "Johanna (Act II)", "By The Sea", "The Judge's Return", "Final Scene (Part 1)", "Final Scene (Part 2)"

Телевизиялық рөлдері

Жылы	Қазақша атауы	Негізгі атауы	Кейіпкері	Қосымша мәлімет
1985	Блю ханым	Lady Blue	Лайонел Виланд	"Beasts of Prey" бөлімінде
1986	Баяу жалын	Slow Burn	Донни Флейчер	ТВ фильм
1987-1991	Джамп стрит,21	21 Jump Street	Офицер Томас "Том" Хэнсон	Телетоптама (57 бөлімде)
1987	Қонақ үй	Hotel	Роб Кэмерон	"Unfinished Business" бөлімінде
1999	Диблилік дін қызметшісі	The Vicar of Dibley	Өзі	"Celebrity Party" бөлімінде
2000	Жылдам шоу	The Fast Show	Өзі	"The Last Ever Fast Show" бөлімінде
2004	Бір төбенің патшасы	The King of the Hill	Йоги Виктор (дыбыстау)	"Hank's Back" бөлімінде
2009	Спонж Боб шаршы шалбар	SpongeBob SquarePants	Джек Кахуна Лагуна (дыбыстау)	"SpongeBob vs. The Big One" бөлімінде
2011	Өмір тым қысқа	Life's Too Short	Өзі	2-бөлімінде

Сыртқы сілтемелер

• Джонни Депп (ағыл.) Internet Movie Database сайтында