Жамбыл ескерткіші — Тараз қаласындағы монументті өнер туындысы. Жамбыл Жабаев атындағы алаңда 1961 ж. орнатылған. Ақын ұлттық киімде, сол қолына домбыра ұстап тұрған күйінде кескінделген. Мүсін мыс араластырылған шойын қоспасынан құйылып, қола жалатылған. Қордайдың қызғылт гранитінен жасалған тақталармен қапталған төрт бұрышты биік тұғырға қойылған. Мүсіннің биіктігі 5 м. тұғырдың алдыңғы бетінде шығып келе жатқан шұғылалы күн бейнесі мен тау шыңдары бедерленген. Одан жоғары "Жамбыл Жабаев, 1846 -1945" деген жазуы бар. Ескерткішке аласа баспалдақтармен көтерілуге болады. Архитекторы - В.Сощенко, мүсінші - Қазақстанның халық суретшісі Х.Наурызбаев. Мүсін Ленинград (қазіргі Санкт-Петербург) қаласында, "Монумент Скульптура" зауытында құйылған.[1]
