Жұмсақ ұлпа

Жұмсақ ұлпа (лат. pulpa — жұмсақ) — тіс қуысында орналасқан тістің жұмсақ бөлігі. Жұмсақ ұлпа қан тамырлары мен жүйкелерге бай, жіңішке талшықты борпылдақ дәнекер ұлпасынан тұрады. Ол шеткі, аралық және орталық қабаттардан құралған. Шеткі қабатты пішіні алмұрт тәрізді дентин түзуші жасушалар — одонтобласттар (дентинобласттар) құрайды. Дентинобласттардың өсінділері дентин мен кіреукені (эмальды) минералдық тұздармен қамтамасыз етуге қатысады. Сонымен қатар, шеткі қабатта толық жетілмеген жас коллаген талшықтары кездеседі. Аралық қабат жас коллаген талшықтары мен ұсақ жасушалардан тұрады. Орталық (негізгі) қабат адвентициальды жасушалардан, макрофагтардан, фибробласттардан және коллаген талшықтарынан құралған. Эластин талшықтары болмайды. Жұмсақ ұлпаның негізгі қызметі — тісті қоректендіру және ондағы зат алмасу процесін іс жүзіне асыру.