Итауыз мыс кені

Итауыз мыс кені, Қарағанды облысы Ұлытау ауданында, Жезқазған қаласынан солтүстік-батысқа қарай 30 км жерде орналасқан. Кен орнын 1955 ж. геолог В.М. Потапочкин ашқан. 1984 ж. барлау жұмыстары (В.А. Струтынский, В.И. Ужва, Ә.Б. Байбатша, т.б.) аяқталған. Итауыз мыс кені Жезқазған синклиналінің бір қанатын құрайды. Кен алаңының құрылысына алеврит (құмайт), құмтас және конгломераттан тұратын Тасқұдық пен Жыланды горизонттары кіреді. Кен орнында желек, линза және таспа пішінді, қалыңдықтары әр түрлі 54 кен денесі анықталған. Кен денелерінің ұзындығы созылу бағытында 4590 метрге дейін, еңістену бағытында 1500 метрге дейін, қалыңдығы 0,25 – 22,7 м. Мыстың есептік блоктардағы үлесі 1,0 – 1,2%, ал кен орны бойынша орташа үлесі 1,12%. Біршама бай кентас кен орнының орта бөлігінде шоғырланған, шетіне қарай кенді денелердің қалыңдығы мен құрамындағы мыстың мөлшері азаяды. Осы бағыттарда кентастың минералдық кұрамы халькозин-борниттен халькопиритке өзгереді. Қорғасынды-мырышты кентас шағын линзалар түрінде кен орнының төм. горизонттарында кездеседі. Кен орнының негізгі элементі – мысалы Қорғасын мен мырыштың өнеркәсіптік мәні аз. Серіктес элементтер ішінде күміс пен рений басты орында, олардың мөлшері тиісінше 6,4 г/т және 1,5 – 1,6 г/т. Кен орнын «Қазақмыс» корпорациясы ашық әдіспен игеруде.

Сілтемелер

“Қазақ Ұлттық Энциклопедиясы”, 4 – том