Иірілмелі тербеліс

Иірілмелі тербеліс, бұралмалы тербеліс – серпімді жүйедегі тербелістердің бір түрі. Иірілмелі тербеліс әсерінен серпімді жүйенің жекеленген элементтері бұралу деформациясына ұшырайды. Бір жақ ұшы басқа бір шомбал дискіге бекітілген серпімді өзек (стержень) түріндегі иірілмелі маятник тербелісі де иірілмелі тербеліске жатады. Иірілмелі маятник әр түрлі физикалық құралдарда қолданылады. Иірілмелі тербеліс машиналар мен механизмдер құралымдарында, әсіресе, іштен жану қозғалтқыштарының иінді білігінде, т.б. қажетсіз құбылыстарды (мысалы, резонанс салдарынан нәрсенің белгілі бір бөліктерінің қирауы) туғызады. Сондықтан күрделі жүйе (авиац. құралымдарда, т.б.) бөліктеріндегі меншікті тербеліс жиілігінің бұраушы моменттің негізгі жиіліктерінің бірімен сәйкес келмеуі алдын ала ескеріледі.