Кавказ қойы

Кавказ қойы – биязы жүнді қой тұқымы. Жүн, ет өндіру мақсатымен өсіріледі. Жаңа кавказ биязы жүнді қойын америкалық рамбулье қойының қошқарымен будандастыру арқылы 1921 – 36 ж. Ресейдің асыл тұқымды қой зауыттарында шығарылған. Дене бітімі шымыр, кеудесі көлемді, тұрқы ұзын, сүйегі берік, аяқтары мықты келеді. Терісі тығыз, жақсы жетілген, мойнында 1 – 3 қатпары, денесінде ұсақ дене қыртыстары болады. Орта есеппен қошқарлары 10 – 12 кг (таңдаулылары 25 кг), саулықтары 5,8 – 6,5 кг (таңдаулылары 13 кг) жүн береді. Жүнінің ұзындығы 7,5 – 8,5 см. Таза жүн шығымы 38 – 43%. Қошқарының тірідей салмағы орта есеппен 90 – 100 кг, саулығынікі 50 – 60 кг, өсімтал тұқым. Әр жүз саулықтан 140 – 150 қозы алынады. Қозылары тез жетіледі. Бұл тұқым құрғақ далалы аймақтың жер жағдайына жақсы бейімделген. Кавказ қойы Батыс Қазақстан облысының көптеген аудандарында жергілікті қой тұқымын жақсартуға пайдаланылады.