Кеннен сынама алу

Уикипедия — ашық энциклопедиясынан алынған мәлімет
Навигацияға өту Іздеуге өту

Кеннен сынама алу – кен орындарының әр түрлі нүктелерінен кентастың белгілі мөлшердегі үлгісін алып, оның қасиеттері мен сапасын зерттеу процесі. Сынаманың деректері негізінде кен денесінің қалыңдығы, таралу алабы, қорының мөлшері, өндіру және технологиялық өңдеу, байыту әдістері анықталады.Кеннен сынама алу жасалатын зерттеудің сипаты бойынша хим., минералогиялық, техникалық және технологиялық болып бөлінеді. Химиялық сынау кен байлықтарының хим. құрамын, олардағы пайдалы құраушылар мен зиянды қоспалардың мөлшерін білу үшін жүргізіледі. Минералогиялық сынама жасағанда кентастың минералдық және петрографиялық құрамы анықталады. Техникалық сынама физикалық-механикалық қасиеттері зерттелуге тиіс пайдалы қазбаларға, мыс., құрылыс материалдарына (созуға, қызуға беріктігін, отқа төзімділігін, т.б. қасиеттерін айқындау үшін), асбестке (талшықтарының ұзындығын айқындау үшін) жасалады. Техникалық сынама пайдалы қазбаларды өңдеу, байыту, балқыту әдістерін зерттеуді көздейді. Кеннен сынама алу процесі 3 кезеңнен тұрады: 1) ұңғыма, шурф, жыра, карьер үйінділерінен сынама алу; 2) сынамаларды өңдеу, талдау, әзірлеу; 3) сынау. Сынамалар атызды, терме, қырма, штуф, бұрғылау, жалпы әдістермен алынады. Бұлардың ішіндегі көп тарағаны атызды әдіс. Жалпы әдіс техникалық және технологиялық сынамалар алу үшін қолданылады. Бұл әдіспен алынған сынаманың бастапқы салмағы ондаған кг-нан ондаған т-ға дейін жетеді. Сынамаларды сынауға дайындау алынған сынамаларды ұсақтау, елеу, араластыру, тиісті мөлшерге жеткізу сатыларынан тұрады. Алынған сынамаларды сынау арқылы олардағы пайдалы құраушылардың мөлшерін анықтау (хим. сынама үшін), физикалық және механикалық қасиеттерін зерттеу (техникалық сынама үшін), кентасты неғұрлым тиімді өңдеу және пайдалану жолдары шешіледі.[1]

Дереккөздер:[өңдеу | қайнарын өңдеу]

  1. Қазақ энциклопедиясы