Кіші Борсық

КІШІ БОРСЫҚ– Сол түстік Арал маңындағы құмды алқап. Ақтөбе облысы Шалқар және Қызылорда облысының Арал аудандары жерінде. Кіші Арал тенізінің сол түстігінде 80 км-ге созылған. Ені 10 – 25 км. Орташа биіктігі 150 – 170 м, абсолют биіктігі 213 м (орта тұсында). Тұран тақтасының синклинальдық иінінде. Құмды алқап бор және палеоген тау жыныстарының жел (эол) әрекетінен үгілу нәтижесінде пайда болған. Әр түрлі бұта және шала бұта басқан құм төбешіктерден, шағыл құмдардан тұрады. Құм шөл белдемінде жатыр. Климаты тым континенттік, қысы суық (қаңтардың орташа температурасы –12 – 15°С), жазы ыстық, құрғақ (шілденің орташа температурасы 25 – 26°С). Жылдық жауын-шашын мөлшері 150 мм, көктемнің соңы мен жаздың басында жауын көп жауады. Грунт суы 2 – 40 м тереңдікте кездеседі, көбінесе тұщы. Құмайт қоңыр топырағында еркек шөп, жусан, бетеге, жүзгін, т.б. өседі. Құмда қыстаулар, тұщы құдықтар көптеп кездеседі.

^[1]