Күшік флорасы

КҮШІК ФЛОРАСЫ– қазба өсімдіктер. Қостанай облысы Амангелді ауданындағы Күшік қыстауынан 1,5 км төмен, өзен бойынан табылған. Алғашында бұл жерден миоцен кезеңінің басында тіршілік еткен жануарлар сүйектері анықталды. Кейінірек сүйектер табылған шөгінді қабаттардан сол уақыттарда өскен өсімдіктердің тозаңдары, дәндері және шөгінді қатпарларында сақталып қалған жапырақтарының таңбалары табылды. Күшік флорасында тозаңды өсімдіктердің 20 түрі анықталды. Оның ішінде көпшілігі – қырық жапырақ, қарағай және самырсын өсімдіктері. Гүлді өсімдіктерден емен, грек жаңғағы, қайың, қандыағаш, үйеңкі, шегіршін, шаған, т.б. барлық Жапырақтарының таңбаларынан өсімдіктердің 46 түрі анықталды. Оның 11 түрі (Quercus kuschukensіs, Quercus amangeldіrіsіs, Quercus popovіl, Quercus kustanaіca, Sorbarіa callіcomaefolіa, Cercіs kryshtofovіchіі, Myrtophyllum kuschukensіs, Cornus aralensіs, Vaccіnіum palaeoretusum, Perіploca kryshtotovіchіі, Trapa vassіljevіі) ғылымда жаңадан анықталған түр болып табылады. Ертедегі жануарлар мен өсімдіктер қалдықтарының бір жерден табылуының палеонтол. зерттеулер үшін маңызы зор. Күшік флорасы миоценнің бас кезіндегі Торғай өңірінде емен, қайың, жаңғақ, шаған, қырықжапырақ ағаштарынан тұратын аралас орман болғанын көрсетеді. Олардың көпшілігі қазір Жерорта тенізнің шығысында, ал кейбір түрлері Шығыс Азия мен Солтүстік Америкада өсетін өсімдіктерге ұқсас келген. Күшік флорасының топырақтың шөгінді қабаттарының геологиялық жасын анықтауда, олардағы жануарлар мен өсімдіктердің қазба қалдықтарының таралуын зерттеуде алатын орны ерекше.