Көксау

Көксау (Emphysema pulmonorum) – көбінесе, жылқыда кездесетін өкпе ауруының бір түрі. Альвеола өте кеңейіп, аралық тіндерге ауа жиналуынан өкпенің көлемі үлкейеді. Көксау жедел түрінде де байқалады, созылмалы түрі де кездеседі. Көксау малды үнемі ауыр жұмысқа пайдаланудан, ыстық тымырсық қорада ұзақ ұстаудан, суық тиюден, құнарсыз шіріген азықтан болады.

Аурудың белгісі: мал тез болдырады, ентігеді, танауынан сілекей ағады. Көксау ұзаққа созылса, ауру малдың тыныс алуы 2 – 3 есе жиілейді. Ауру асқынса, мал жөтелгенде булығып, қатты ауырсынады. Көксауға шалдыққан малды жұмыстан босатып, ауасы таза, жарық, жылы, құрғақ қорада ұстайды. Жұмсақ пішен, сұлы, аздап көк шөп, сәбіз, шалқам береді. Көкірегін жылытады, электрмен емдейді. Тері астына 0,03 – 0,05 г-дай атропин не эфедрин жібереді, қанына хлорлы кальций құяды. Өкпе қуысына тазартылған (стерильді) ауа жіберу жақсы нәтиже береді.