Көк терек

КӨК ТЕРЕК(Рopulus tremula) – талдар тұқымдасы, терек туысына жататын жапырақ тастайтын ағаш. Шу – Іле аңғары мен Батыс Тянь-Шаньнан басқа республиканың барлық жерлерінде кездеседі. Өзен жайылмасында, далалық жерлерде, тау етегінде, бұта арасында өседі. Биікт. 35 м-дей, бөрікбасы (ағаш діңінен жоғары тармақтала өскен бөлігі) шашақты, діңі түзу, тегіс, қабығы жасыл сұр түсті. Жапырағы дөңгелек, жиегі біркелкі емес, тісті. Жапырақ сағағы жапырақ тақтасынан ұзын, екі бүйірінен жалпайған, соның нәтижесінде сәл жел тұрса, жапырақтары тербеледі. К. т-тің қайыңнан айырмашылығы қос үйлі. Гүлдері көп және ұсақ, гүл сырғасы салбырап ілініп тұрады, онда аталығы не аналығы болады. Негізінен жапырағы шыққанша гүлдейді. Тұқымынан және атпа тамырларынан, шыбығынан көбейтіледі. Жел арқылы тозаңданады. Тұқымы өте ұсақ, олардың жіңішке қылтанды күмістей айдаршасы болады және желмен таралады. К. т. өте тез өседі, ағаш сонысымен өте бағалы. Табиғи жағдайда 150 – 200 жылдай өсіп тұрады. К. т-ті әсемдік өсімдік ретінде өсіреді. Діңі жеңіл, ақ түсті, құрылыста, жиһаз, ағаш бұйымдарын жасауда қолданылады, қағаз, сіріңке өнеркәсіптерінде пайдаланылады. Қабығымен теріні сары түске бояйды. Бүршігінің емдік қасиеті бар, сондықтан оны халық медицинасында кеңінен қолданады.‎