Малды өлшеу

Малды өлшеу - малдың салмағы мен тұлғасын, дене бітімін анықтау үшін қолданылатын өлшеу әдістерінің бірі. Малды өлшеу арқылы оның өсіп-жетілуін, одан алынатын өнім мөлшерін анықтайды. Малдың салмағын түліктің түріне, жасына байланысты таразы не безбенмен, ал малдың бойын арнайы өлшеуіш таяқ, таспа және циркулмен өлшейді. Малды өлшеу түрлері, жиілігі өсіріп отырған түліктің түріне және өсіріліп отырған мақсатқа байланысты болады. Мысалы, жас төлдің, бордақыланатын малдың өсіп-жетілуін бақылау үшін айына бір рет тек салмағын өлшеу жеткілікті болса, ғылыми-зерттеу мақсатында мал салмағымен қатар денесі 28-52 жерінен өлшенеді. Асыл тұқымды мал кітабына жазылатын мал басының салмағына қоса, мүйізді ірі қара мал денесінің - 12, жылқыныкінің - 4, шошқаныкінің - 2-4 өлшемі енгізіледі.