Мартин Гор

Уикипедия — ашық энциклопедиясынан алынған мәлімет
Мұнда ауысу: шарлау, іздеу
Мартин Гор.

Мартин Ли Гор (ағылшынша Martin Lee Gore) – ағылшын поэты әрі музыканты. 1961 жылы 23 шілдеде Англияның Эссекс графтығы Дагенем кентінде дүниеге келген. Depeche Mode тобы құрылған сәттен (1980 ж.) бастап, ұжым құрамында.

1981 жылдан топ әндерінің басым көпшілігінің сөзі мен музыкасының авторы. Ұжымда қосалқы яки басты вокалдық орындаушы рөлімен қатар, гитара мен пернетақтада ойнайды. Горды электрондық музыка саласының дамуына өлшеусіз үлес қосқан дейді осы саланың мамандары. Топтағы жұмысынан бос уақытында ди-джей болғанды ұнатады. Гитарамен 13 жасында-ақ танысқан Мартин сәлден соң онда ойнауды үйреніп алады.

Гор жасынан Roxy Music, Kraftwerk, Can музыкасына тәнті болып, кейіннен осы орындаушылар оның шығармашылығына әсерін тигізгенін айтқан болатын. Басында Norman and The Worms дуэтінде мүше болған Мартинді Винсент Кларк пен Эндрю Флетчер байқап қояды. Солардың қатарына Гор қосылғаннан кейін, біраздан соң оларға Дэйв Гэан қосылады. Өмірге Depeche Mode келді.

Топта қарапайым пернетақташы болып жүрген Гор ұжымның басты музыканты болған Винсент Кларк кеткенінен кейін ДМ-дегі тізгінді қолға алады. Кларктың кетуі Мартиннің тасы өрге домалауына ғана емес, жалпы ұжымның шығармашылығына оң әсерін тигізді. Олай дейтініміз, қазіргі кезде Мартиннің мүмкіншіліктері Кларктан әлдеқайда жоғары екендігіне көз жеткізу қиын емес. Міне, Гордың жазған әндері әлемнің жұртшылығын 30 жылдан астам уақыт бойы риза етіп келеді. Оның әндерінде терең мағыналы сөздер мен әдемі мелодия тамаша үйлесіп жатады. Coldplay, Smashing Pumpkins, The Cure, The Bloodhound Gang, Paradise Lost, секілді топтар Гордың музыкасы алдында бас иіп, олардан көп нәрсе үйренгенін жасырмайды.

Мартин Гордың шығармашылығы Depeche Mode-пен шектелмейді. Өзіндік вокалға ие ол 1989 жылы жеке Counterfeit E.P. күйтабағын шығарды. Ол ағылшын хит-парадтарында 57-орынды иеленді.