Нұғыман Ыбырайұлы Баяндин

Нұғыман Ыбырайұлы Баяндин (12.1.1912, қазіргі Павлодар облысы Баянауыл ауданы Беріктас ауылы – 15.9.1991, Алматы қаласы) – топырақтанушы, ауыл шаруашылығы ғылымының докторы (1973). Ташкент қаласындағы Орта Азия мемлекеттік университетін бітірген (1941) соң Қазақстан ғылым академиясының Топырақтану ин-тында ғыл. еңбек жолын бастаған. Баяндин ғыл. экспедициялар құрамында Қазақстанның бірқатар жерлерін (Ертіс бойы, Семей, Зайсан, Сырдарияның төм. жағы мен Алтай өңірі, т.б.) зерттеу жұмысына қатысты. Ол басқарған ғыл. экспедициялар жұмысының нәтижесінде Қазақстанның осы аймақтары топырағының толық картасы жасалды. Бірқатар пед. ин-ттарында (Қазақ пед. ин-ты, Қазақ қыздар пед. институты, Семей және Шығыс Қазақстан пед. институты) оқытушы және Қазақ мемл. а. ш. ин-тында доцент (1950–1972) қызметтерін атқарған. Баяндин Қазақстан топырағы жайлы бірқатар ғыл. еңбектердің («Освоение пойменных земель», 1973; «Школьникам о географических открытиях», 1979; т.б.) авторы.^[1]