Сарыоба темір кені

Сарыоба темір кені— Қостанай обл. Жетіқара ауд. Жетіқара т. ж. ст-ның оңт-не қарай 40 км жерде орналасқан кен. Кен орны 1938 ж. ашылып, 1943 — 49 ж. барлау жұмыстары жүргізілді, 1952 ж. қоры есептелді. Кен Орал сырты мегантиклинорийіндегі Боранбай гранитті массивінің экзожапсарында орналасқан. Интрузия жапсары бойымен 4,5 км созылған скарнды-кенді белдемнің қалыңд. 150 — 200 м. Кеннің барлық кентастары скарнды, олар екі ірі кен денесін құрайды. Негізгі кен денесі жер бетінде жатыр; созылымы 1200 м, құлау бағытында 320 м, қалыңд. 8 — 40 м. Жасырын денесі жер астында; созылымы 328 м, тереңд. 100 м, қалыңд. 16 — 50 м. Кішігірім денелерінің қалыңд. 0,2 — 5 м-ден 15,4 м-ге дейін болады. Басты кенді минералдары: магнетит пен мартит; қосымшалары: гидрогетит, гетит, пирит, т.б., ал кенсіздеріне гранат, эпидиот, пироксин, актинолит жатады. Бастапқы кендері женттасты (брекчия). Құрамында 34,46% темір мен аздаған күкірт, фосфор кездеседі. Тотығу белдеміндегі кендер қойтасты, охралы-лимонитті, ұнтақты, мартитті, т.б. болып келеді. Ондағы темір 35 — 57%, ал фосфор мен күкірттің мөлшері өте аз. Сарыоба Темір Кеніндегі кеннің қоры 41 млн. т, мұндағы темір мөлшері 36,1%.^[1]