Сиырды сүтейту

Сиырды сүтейту - бұзаулаған сиырдың сауым басталғандағы тәуліктік сүттілігін арттыру кезеңі. Сиырды сүтейту сиырдың ертеңгі сүттілігінің бүгінгіден артуын алдын-ала үстемелеп, яғни нақтылы сауылған сауымынан арттырып, азықтандырудан бастап, желінін сылап-сипап, массаждап, жиі сауумен жалғастыра отырып, қысқа мерзімде жоғары сүт сауымына жеткізуді іске асырады. Үстемелеп азықтандыруды сиыр сүттілігі 2-3 рет қатарынан өзгермегенде барып тоқтатады. Бұл сиырды сүтейту кезеңінің аяқталып, одан әрі сауымның нағыз қызған кезеңінің басталғанын көрсетеді. Демек, сауым басында неғұрлым қысқа мерзімде сиыр сүтейтілсе, соғұрлым сауымның мол сүтті қызған кезеңінің мерзімі ұзартылып, сиырдың сүт өнімділігі өседі. Сиырды сүтейтудің әсіресе жас құнажындардың мол сүттілігін қалыптастыруға ықпалы күшті.