Скопас

Уикипедия — ашық энциклопедиясынан алынған мәлімет
Мұнда ауысу: шарлау, іздеу

Скопас — б. э. бұрынғы IV ғ. гректің ұлы мүсіншісі, Парос аралында туған, әкесі мүсінші болған. Шебердің творчестволық қызметі б. э. бұрынғы 380—330 жж. жатады, ол Аттикада, сондай-ақ Грөкия мен Кіші Азияның көптеген қалаларында жұмыс істеді. Скопас Тегеяда (Пелопоннес) Афина храмын салып, оның фронтондарына санаулы жұрнақтары ғана сақталған мүсіндік композициялар жасады. Б. э. бұрынғы 350 ж. шамасында белгілі мүсіншілер Леохар, Пифей, Тимофей және Браксиспен бірге Скопас атақты Галикарнас Мавзолейін салуға қатысты. Ол шығыс жақ беттегі гректердің амазонкалармен шайқасын бейнелейтін бедерлі фризді жасаған сол (фриздің жекелеген тақталары Британия музейінде тұр.). Ежелгі әдебиетте Скопас сомдаған 25 мәрмәр мүсіннің аты сақталған. Оның өнері драмалық пафосқа толы. Мүсінші жасаған бейнелерде қайсар рухани сезім дүниесі, құштарлық арпалысы ашылады. Рим замайының көшірмелері арқылы «Менада» (Дрезден), «Жас Геракл» (АҚШ), «Мелеагр» (Ватикан мен Медичи вилласы, Рим), сондай-ақ сағынышқа толы тұспал тұлға «Потос» (Дрезден мен Уффици галереясы, Флоренция) мүсіндері сақталған.[1]

Дереккөздер[өңдеу]

  1. Өнердің ықшам тарихы—Антик өнері — Алматы, «Өнер» баспасы, 1988.—360 бет ISBN 5-89840-030-3