Тасжеміс

Уикипедия — ашық энциклопедиясынан алынған мәлімет
Навигацияға өту Іздеуге өту
Тасжеміс
Ғылыми топтастыруы
Дүниесі: Өсімдіктер
Бөлімі: Гүлді өсімдіктер
Табы: Қос жарнақтылар
Сабы: Brassicales
Тұқымдасы: Brassicaceae
Тегі: Euclidium
W. T. Aiton
түрлері

2 түрі белгілі

Тасжеміс (лат. Euclidium) – орамжапырақ тұқымдасына жататын бір жылдық өсімдік. Қазақстанда сазды далаларда, жайылымдарда, өзен жағаларында, құрғақ тұзды ойларда, жол жиегінде, үй маңында өсетін 1 түрі – сирия Тасжемісі (Е. syrіacum) бар. Оның биіктігі 4 – 25 см, сабақтары түбінен бастап тармақталған, сыртын қатты түк жапқан. Жапырақтары ұзынша, эллипс тәрізді, ұшына қарай қысқарып, үшкірленіп келеді. Шетінде қысқа, аса білінбейтін тістері бар не тегіс болады. Төменгі жапырақтары сағақты, ал қалғандарының сағағы болмайды. Тостағанша жапырақшалары қисайған, күлтелері таспа тәрізді, ақ түсті. Аталығы бос жатады, тісшелері болмайды, аналық аузы қос қалақты. Ұсақ гүлдері шашақ гүлшоғырына топталған.

Сәуір айында гүлдеп, мамыр – маусымда жемісі піседі. Жемісі – қақырамайтын, екі тұқымды жаңғақша тәрізді бұршаққын. Оның ұзындығы 3 мм-дей, сабаққа жабысып жатады, сыртын тарам-тарам түк басқан. Тасжеміс – мал азықтық шөп, көп жағдайда қойды семірту үшін беріледі.[1]

Дереккөздер[өңдеу | қайнарын өңдеу]

  1. Қазақ энциклопедиясы