Фурманов Дмитрий Андреевич

ФУРМАНОВ Дмитрий Андреевич (7.11.1891, Кострома губ. Середа с. — 15.3.1926, Мәскеу қ.) — орыс жазушысы. Шаруа отбасында дүниеге келген. 1912 — 1914 ж. Мәскеу ун-тінің филология ф-тінде оқыды. 1-дүниежүз. соғысқа қатысып, Ақпан революциясынан кейін кеңес өкіметі жағына шықты. 1919 — 1921 ж. Азамат соғысы майдандарында (Чапаев дивизиясының комиссары, Түркістан майданы саяси басқармасының бастығы, т.б.) болды. Түркістан майданы саяси басқармасының Жетісудағы уәкілі болған кезінде Алматы қ-ндағы ақ казактардың 1920 ж. 11 — 12 шілдеде жасаған кеңес өкіметіне қарсы бүлігін, кейіннен Кубаньға түсірілген врангельдік десантты талқандауды басқарды. 1924 ж. Мәскеу мемл. ун-тінің қоғамдық ғылымдар ф-тін бітірген. 1924 — 1925 ж. пролетарлық жазушылардың Мәскеу қауымдастығының (МАПП) хатшысы болды. Шығармалары 1912 жылдан бастап жариялана бастаған. Неғұрлым белгілі шығармалары: “Қызыл десант" (1922), “Он сегізінші жылы” (1923) және “Бүлік” (1925) повестері, М.В. Фрунзе жөніндегі очерктер топтамасы, т.б. Ф-тың “Чапаев” романы бойынша “Чапаев” (1934) кинофильмі түсірілді. Жетісудағы Азамат соғысы жөнінде “Бүлік” повесі мен романын жазды. Осы повесі мен пьесасы, “Чапаев” романы 20 ғ-дың 30-жылдарында қазақ тіліне аударылды. Алматы қ-ндағы орт. көшелердің біріне Ф-тың есімі берілген.

Сілтемелер

"Қазақ Энциклопедиясы" 9 том