Сергей Павлович Шевченко

Шевченко Сергей Павлович (21.10.1927, Солтүстік Қазақстан облысы, Совет ауданы, Борки ауылы - 2001)- жазушы, сценарист. Петропавл қаласында мұғалімдер институтын, Алматы жоғары партия мектебін бітірген (1965). 1948 - 50 жылдары Коноваловск жетіжылдық мектебінің директоры, сонан кейін Солтүстік Қазақстан облысы оқу бөлімі меңгерушісінің орынбасары, Петропавл педагогикалық институтының проректоры, 1961 жылы - Петропавл телестудиясының бас редакторы, Содан кейін Павлодар қаласындағы облыстық телерадио комитетінің орынбасары, Павлодар облысы "Звезда Прииртышья" газетінің редакторы болып қызмет істеген. 1953 жылы "Учительская газетада" алғашқы әңгімесі жарияланды. 1960 жылы "Степные зори" атты ұжымдық жинаққа қатысты. 1974 жылдан "Простор" журналында повестері мен очерктері тұрақты жарияланып келеді. Жеті деректі фильмнің авторы. "Энергия Экибастуза" толық метражды деректі фильмі ("Қазақфильм") бүкілодақтық экранға шыққан. "Еңбектегі ерлігі үшін" медальдарымен марапатталған. "КСРО телевидениесі мен радиосының озық Қызметкері" атағы берілген.