Қазақстан Республикасының Үкіметі

Уикипедия — ашық энциклопедиясынан алынған мәлімет
Навигацияға өту Іздеуге өту
Қазақстан Республикасының Үкіметі
Жалпы мағлұмат
Мемлекет  Қазақстан
Құрылған уақыты 18 желтоқсан 1995 жыл
Оның алдындағы мекеме ҚР Министрлер Кабинеті
Штаб-пәтері Астана, Мәңгілік Ел даңғылы, 6-үй
Премьер-Министр Олжас Бектенов
Ресми сайты
primeminister.kz

Қазақстан Республикасының ҮкіметіҚазақстан Республикасының жоғары атқарушы билiк органы, атқарушы органдардың жүйесін басқарады және олардың қызметіне басшылық жасайды.

Үкімет — алқалы орган және өзінің бүкіл қызметінде Қазақстан президентінің алдында жауапты және Конституцияда көзделген жағдайларда Мәжіліс алдында жауапты. Қазақстан президенті үкіметті конституцияда көзделген тәртіппен құрады. Үкімет мәртебесі, құқықтары мен міндеттері Қазақстан конституциясының V-тарауы бойынша және Қазақстан Республикасының Үкімет туралы заңы бойынша реттеледі.

Қазақстан үкіметі президенттік республиканы қадағалайды. Қазақстан президенті мемлекет басшысы болып табылады және үкімет басшысы болып табылатын Қазақстан премьер-министрін ұсынады. Атқарушы билікті үкімет жүзеге асырады. Заң шығарушы билік үкіметке де, парламенттің екі палатасына да берілген.

Тарихы[өңдеу | қайнарын өңдеу]

2014 жылы 6 тамызда Үкіметтің экономика және әлеуметтік саланың өзекті мәселелеріне арналған кеңейтілген отырысы өтті.[1] Президент отырыс барысында ықшам Үкімет құру қажеттігін айтты. Осы мақсатта 17 министрлік, 9 агенттік орнына 12 министрліктен тұратын жаңа Үкіметтің құрылымы туралы шешім қабылданды. Үкімет құрамында болған барлық агенттіктер министрліктердің құрамына комитет ретінде кірді.

2015 жылы 11 желтоқсанда Мемлекеттік қызмет істері және сыбайлас жемқорлыққа қарсы іс-қимыл агенттігінің орнына Қазақстан Республикасының Мемлекеттік қызмет істері министрлігі құрылды.

2016 жылы 6 мамырда Ақпарат және коммуникациялар министрлігі құрылды.

2016 жылы 13 қыркүйекте Дін істері және азаматтық қоғам министрлігі құрылды.[2] Сонымен қатар Мемлекеттік қызмет істері министрлігі Президентке тікелей бағынатын Мемлекеттік қызмет істері және сыбайлас жемқорлыққа қарсы іс-қимыл агенттігі болып құрылды.

2016 жылы 6 қазанда Қорғаныс және аэроғарыш өнеркәсібі министрлігі құрылды.[3]

2017 жылы 25 қаңтарда Денсаулық сақтау және әлеуметтік даму министрлігі Еңбек және халықты әлеуметтік қорғау министрлігі және Денсаулық сақтау министрлігі болып екіге бөлінді.[4]

2018 жылы 28 маусымда Дін істері және азаматтық қоғам министрлігінің атауы Қоғамдық даму министрлігі болып өзгерді.[5]

2018 жылы 26 желтоқсанда Инвестициялар және даму министрлігі инвестиция саласындағы өкілеттігі Ұлттық экономика және Сыртқы істер министрліктеріне беріліп, Индустрия және инфрақұрылымдық даму министрлігі болып құрылды.[6]

2019 жылы 25 ақпанда Қоғамдық даму министрлігі мен Қорғаныс және аэроғарыш өнеркәсібі министрлігіне таратылған Ақпарат және коммуникациялар министрлігінің өкілеттіктері беріліп, екі министрлік сәйкесінше Ақпарат және қоғамдық даму министрлігі мен Цифрлық даму, қорғаныс және аэроғарыш өнеркәсібі министрлігі болып ұйымдастырылды.[7]

2019 жылы 17 маусымда жаңадан Сауда және интеграция, Экология, геология және табиғи ресурстар министрліктері құрылды.[8] Цифрлық даму, қорғаныс және аэроғарыш өнеркәсібі министрлігі бірқатар функциялар алып, атауы Цифрлық даму, инновациялар және аэроғарыш өнеркәсібі министрлігі болып өзгерді.[9]

2022 жылы 11 маусымда Білім және ғылым министрлігі екіге бөлініп, Оқу-ағарту министрлігі мен Ғылым және жоғары білім министрлігі құрылды.[10]

2023 жылы 2 қаңтарда Экология, геология және табиғи ресурстар министрлігінің геология саласындағы функциялары Индустрия және инфрақұрылымдық даму министрлігіне беріліп, Экология және табиғи ресурстар министрлігі болып қайта ұйымдастырылды.[11]

2023 жылы 1 қыркүйекте Президент Жарлығымен Инфрақұрылымдық даму министрлігі болып екіге бөлініп, Көлік министрлігі және Өнеркәсіп және құрылыс министрлігі құрылды. Ақпарат және қоғамдық даму министрлігі Мәдениет және ақпарат министрлігі болып, ал Мәдениет және спорт министрлігі Туризм мен спорт министрлігі болып өзгерді.[12] Сонымен бірге Ауыл шаруашылығы министрлігінен бөлініп, жаңадан Су ресурстары және ирригация министрлігі құрылды.

Құқықтық мәртебесі[өңдеу | қайнарын өңдеу]

Қазақстан Республикасының Үкіметі — мемлекеттік билiктiң ерекше тармағы ретiнде министрлiктерден, агенттiктерден, комитеттерден тұратын орталық атқарушы органдар, облыстық, аудандық және қалалық әкiмшiлiктерден тұратын жергiлiктi атқарушы органдар жүйесiн басқарады және олардың қызметiне басшылық жасайды. Оның құқықтық мәртебесiнiң негiздерi Қазақстан Республикасының Конституциясында бекiтiлген (64-бап). Үкiметтiң құзыретi, ұйымдастырылуы мен қызметiнiң тәртiбi ҚР Конституциясына сәйкес 1995 ж. 18 желтоқсанда қабылданған “Қазақстан Республикасының Үкiметi туралы” (1999 ж. 6 мамырда өзгерiстер мен толықтырулар енгiзiлген) ҚР-ның конституциялық Заңымен белгiленген. Үкiмет ҚР Конституциясының, аталған конституц. заңның, ҚР-ның заңдары мен өзге де нормативтiк актiлерiнiң негiзiнде және оларды орындау үшiн iс-қимыл жасайды.

Үкіметті құру[өңдеу | қайнарын өңдеу]

Үкiметтi Республика Президентi Қазақстан Республикасының Конституциясында көзделген тәртiппен құрады. Премьер-Министр Үкiмет басшысы болып табылады. Премьер-Министрдi Парламенттiң келiсiмiмен Президент қызметке тағайындайды және қызметтен босатады. ҚР-ның Премьер-Министрi өзi тағайындалғаннан кейiн он күн мерзiмде үкiметтiң құрылымы мен құрамы туралы ҚР Президентiне ұсыныс енгiзедi. Президент Премьер-Министрдiң ұсынысы бойынша үкiмет құрылымын анықтайды, оның мүшелерiн қызметке тағайындайды және оларды қызметтен босатады, орталық атқарушы органдарды құрады, таратады, қайта құрады. ҚР Үкiметiнiң құрылымын министрлiктер мен өзге де орталық атқарушы органдар құрайды.

Қазақстан Үкiметi — алқалы орган. Оның құрамына Үкiмет мүшелерi — республиканың Премьер-Министрi, оның орынбасарлары, министрлер, өзге де лауазымды адамдар кiредi. Премьер-Министр мен Үкiмет мүшелерi қызметке кiрiсер алдында Қазақстан халқына және елбасына ҚР Үкiметi туралы конституциялық заңда белгiленген тәртiппен ант бередi. Премьер-Министрге ерекше мәртебе берiлген. Ол Президентке Үкiмет құрамына кiрмейтiн министрлiктердi, орталық атқарушы органдарды құру, қайта құру және тарату туралы, министр қызметiне кандидатуралар жөнiнде, министрдi қызметтен босату туралы ұсыныстар енгiзедi, Үкiметтiң қызметiн ұйымдастырып, оған басшылық жасайды және оның жұмысы үшiн дербес жауап бередi.

Өкiлеттiктері[өңдеу | қайнарын өңдеу]

Үкiметке мынадай негiзгi конституциялық өкiлеттiктер берiлген:

  • ол мемлекеттің әлеуметтік-экономикалық саясатының негiзгi бағыттарын, оны жүзеге асыру жөнiндегi стратегиялық және тактикалық шараларды талдап жасау;
  • мемлекеттік бағдарламаларды әзiрлеу;
  • әлеуметтік-экономикалық және ғылыми-техникалық дамудың индикативтiк жоспарларын әзiрлеп, iске асыру;
  • Республика Президентi белгiлеген тәртiппен респ. бюджеттi және оған енгiзiлетiн өзгерiстердi әзiрлеуге қатысу, парламентке республикалық бюджет және оның атқарылуы туралы есеп беру, бюджеттiң атқарылуын қамтамасыз ету;
  • ҚР-ның қаржы жүйесiн нығайту жөнiндегi шараларды әзiрлеп, жүзеге асыру;
  • мемлекеттік валюталық, қаржы және материалдық қорларының құралуы мен пайдалануы кезiнде заңдылықтың сақталуына мемлекеттік бақылау жасау;
  • құрылымдық және инвестициялық саясатты жүзеге асыру;
  • баға құралуының мемлекеттік саясатын әзiрлеп, ұйымдастыру;
  • мемлекет реттейтiн баға қолданылатын өнiмдердiң, тауарлар мен қызмет көрсетулердiң номенклатурасын белгiлеу;
  • мемлекеттік меншiктi басқаруды ұйымдастыру, оны пайдалану шараларын әзiрлеп, жүзеге асыру, мемлекеттік меншiк құқығының қорғалуын қамтамасыз ету;
  • еңбекке ақы төлеу, азаматтардың әлеуметтік қорғалуы, мемлекеттік әлеуметтік қамсыздандыру және әлеуметтік сақтандыру жүйесi мен шарттарын айқындау;
  • мемлекеттік аймақтық саясаттың негiзгi бағыттарын әзiрлеп, iске асыру;
  • аймақтарды әлеуметтік-экономикалық дамытудың аймақаралық мәселелерiн шешудi қамтамасыз етедi;
  • ғылым мен техниканы дамыту, жаңа технологияларды енгiзу, мәдениеттi, бiлiм берудi, денсаулық сақтауды, туризм мен спортты дамыту жөнiндегi мемл. саясатты айқындап, iске асыру;
  • табиғат қорлары мен қоршаған табиғи ортаны оңтайлы пайдалану және қорғау шараларын әзiрлеп, жүзеге асыру;
  • құқықтық реформалардың жүзеге асырылуын қамтамасыз ету;
  • азаматтардың құқықтары мен бостандықтарын қорғау және заңдылық пен құқықтық тәртiптi сақтау, ҚР-ның қауiпсiздiгi мен қорғаныс қабiлетiн, аумақтық тұтастығын сақтау және қорғау, ҚР-ның мемлекеттік шекарасын күзету шараларын әзiрлеп, iске асыру;
  • келiссөздер жүргiзу және үкiметаралық келiсiмдерге қол қою туралы шешiмдер қабылдау;
  • ҚР-ның шет мемлекеттермен, халықаралық және аймақтық ұйымдармен қарым-қатынасты дамытуын қамтамасыз ету;
  • сыртқы экономикалық саясатты iске асыру шараларын әзiрлеу;
  • сыртқы сауданы дамыту шараларын қолдану;
  • халықаралық қаржы ұйымдарымен ынтымақтастық пен өзара iс-қимылды жүзеге асыру;
  • Конституциямен, заңдармен және президент актiлерiмен жүктелген өзге де қызметтердi орындау.

Үкiмет өзiнiң бүкiл қызметiнде конституцияда және үкiмет туралы конституциялық заңда белгiленген нысандарда Республика Президентiнiң алдында жауапты.

ҚР-ның Премьер-Министрi үкiмет қызметiн ұйымдастырып, оған басшылық етедi, оның жұмысы үшiн жауап бередi, Президентке Үкiмет қызметiнiң негiзгi бағыттары жөнiнде баяндайды, қаулылар шығарады. Үкiмет мүшелерi өз құзыретi шегiнде дербес шешiмдер қабылдайды, Олар өздерiне бағынышты мемлекеттік органдардың жұмысы немесе тапсырылған жұмыс аясы үшiн Премьер-Министрдiң алдында жауап бередi. Парламенттiң әрбiр палатасы үкiмет мүшелерiнiң қызметтерi жөнiндегi есептерiн тыңдауға хақылы. Үкiмет мүшесi заңдарды орындамаған жағдайда депутаттар оны қызметтен босату жөнiнде Президентке мәлiмдей алады. Үкiмет ҚР Конституциясы, заңдары, ҚР Президентiнiң нормативтiк жарлықтары негiзiнде және солардың орындалуы үшiн өз құзыретi шегiнде бүкiл мемлекеттік аумағында мiндеттi күшi бар Үкiмет қаулылары мен Премьер-Министрдiң өкiмдерiн шығарады, олардың iске асырылуын қамтамасыз етедi. Бұл қаулылар мен өкiмдер Конституцияға, заңдарға, Республика Президентiнiң актiлерiне қайшы келмеуге тиiс.

Жаңадан құрылған Үкiмет өз қызметiнiң бағдарламасын жасап, бұл туралы Парламентке баяндама ұсынады. Егер Парламент Үкiметтiң бағдарламасын қабылдамаса, Үкiмет екi ай iшiнде бағдарламаны қайтадан ұсынады. Егер Парламент депутаттарының жалпы санының 2/3-сiнiң дауыс беруiмен бағдарлама тағы да қабылданбаса, онда бұл Үкiметке сенiмсiздiк вотумын бiлдiредi. Үкiмет заңдық ұсыныстар енгiзуге хақылы. Ол заң жобаларының жоспарын құрып, соған сәйкес парламент мәжiлiсiне заң жобаларын ұсынады. Заң жобаларын дайындауға олардың сапасы үшiн жауапты болатын министрлiктер, мемлекеттік комитеттер, агенттiктер, бiрiншi басшылар қатысады. Қазақстан Ресупбликасының Үкіметі Президенттiң өкiлеттiк мерзiмi шегiнде қызмет етедi және жаңадан сайланып, қызметке кiрiскен ҚР Президентiне үкiмет мүшелерi жазбаша қол қойған өтiнiш беру арқылы өз өкiлеттiгiн доғарады.

ҚР-ның Конституциясында (70-бап) және ҚР-ның Үкiметi туралы констиуц. заңда республика Үкiметiнiң, оның мүшелерiнiң тиiстi өкiлеттi мерзiмiнен бұрын орындарынан түсу себептерi мен тәртiптерi қаралған. Егер Үкiмет, оның кез келген мүшесi өздерiне жүктелген мiндеттердi одан әрi орындау мүмкiн емес деп санайтын болса, онда олар республика Президентiне өз орнынан түсуi туралы мәлiмдеуге хақылы. Конституцияда (53-бап, 7-тармақ, 61-бап, 7-тармақ) көзделген жағдайларда Парламент Үкiметке сенiмсiздiк бiлдiретiн болса, Үкiмет өзiнiң орнынан түсуi туралы ҚР Президентiне мәлiмдейдi. Орнынан түсудi қабылдау немесе қабылдамау туралы мәселенi ҚР Президентi он күн мерзiмде қарайды. Орнынан түсудi қабылдау Үкiметтiң не оның тиiстi мүшесiнiң өкiлеттiгi тоқтатылды дегендi бiлдiредi. Премьер-Министрдiң орнынан түсуiн Президенттiң қабылдауы немесе оны қызметiнен босатуы бүкiл Үкiметтiң өкiлеттiгi тоқтатылғанын бiлдiредi. Сондай-ақ, президент өз бастамасымен де Үкiметтiң өкiлеттiгiн тоқтату туралы шешiм қабылдауға және оның кез келген мүшесiн қызметтен босатуға хақылы. Үкiмет жүргiзiп отырған саясатпен келiспейтiн және оны жүргiзбей отырған үкiмет мүшелерi атқарып отырған қызметiнен босатылуға тиiс.

Құрылымы[өңдеу | қайнарын өңдеу]

Министрлiктiң және өзге де орталық атқарушы органдардың басшылары болып табылатын үкiмет мүшелерi: тиiстi мемлекеттік органдарға басшылықты жүзеге асырады; өз құзыретi шегiнде дербес шешiмдер қабылдайды; ҚР Премьер-Министрiнiң алдында өздерiне жүктелген бағынышты мемлекеттік органдардың жұмысы үшiн, сондай-ақ, тиiстi мемлекеттік органдардың қарауына жататын мемлекеттік басқару аясындағы iстiң жайы үшiн дербес жауап бередi; ҚР заңдарының, ҚР Президентi мен Үкiметi актiлерiнiң орындалуын қамтамасыз етедi. Министр ҚР Конституциясында көзделген ретте (37-бап, 6-тармақ) өз қызметiнiң мәселелерi жөнiнде парламент палаталарына есеп бередi.

Үкiмет құрамына кiретiн орталық (республикалық) атқарушы органдарды қызметiнiң сипатына қарай салалық құзыреттi органдарға, салааралық құзыреттi органдарға, бақылау және қадағалау органдарына, мемлекеттiң арнайы немесе ерекше атқарымдарын iске асыратын мамандандырылған мемлекеттік органдарға бөлуге болады.

Министрліктері[өңдеу | қайнарын өңдеу]

Үкіметтің құрамында 21 министрлік бар:[13]

  1. ҚР Ауыл шаруашылығы министрлігі (1992-)
  2. ҚР Әділет министрлігі (1991-)
  3. ҚР Ғылым және жоғары білім министрлігі (1999, 2022-)
  4. ҚР Денсаулық сақтау министрлігі (1991-1997, 2001-2014, 2017-)
  5. ҚР Еңбек және халықты әлеуметтік қорғау министрлігі (1997-2014, 2017-)
  6. ҚР Көлік министрлігі (1991-1994, 2023-)
  7. ҚР Қаржы министрлігі (1991-)
  8. ҚР Қорғаныс министрлігі (1992-)
  9. ҚР Мәдениет және ақпарат министрлігі (2006-2010, 2012-2014, 2023-)
  10. ҚР Оқу-ағарту министрлігі (2022-)
  11. ҚР Өнеркәсіп және құрылыс министрлігі (2023-)
  12. ҚР Сауда және интеграция министрлігі (2019-)
  13. ҚР Су ресурстары және ирригация министрлігі (2023-)
  14. ҚР Сыртқы істер министрлігі (1991-)
  15. ҚР Төтенше жағдайлар министрлігі (2004-2014, 2020-)
  16. ҚР Туризм және спорт министрлігі (2006-2012, 2023-)
  17. ҚР Ұлттық экономика министрлігі (2014-)
  18. ҚР Цифрлық даму, инновациялар және аэроғарыш өнеркәсібі министрлігі (2019-)
  19. ҚР Ішкі істер министрлігі (1991-)
  20. ҚР Экология және табиғи ресурстар министрлігі (1997-1999, 2023-)
  21. ҚР Энергетика министрлігі (2014-)

Бұрынғы министрліктер[өңдеу | қайнарын өңдеу]

  1. Ақпарат және қоғамдық даму министрлігі (2019-2023)
  2. Индустрия және инфрақұрылымдық даму министрлігі (2018-2023)
  3. Мәдениет және спорт министрлігі (2014-2023)
  4. Экология, геология және табиғи ресурстар министрлігі (2019-2023)
  5. Білім және ғылым министрлігі (1999-2022)
  6. Ақпарат және коммуникациялар министрлігі (2016-2019)
  7. Қоғамдық даму министрлігі (2018-2019)
  8. Қорғаныс және аэроғарыш өнеркәсібі министрлігі (2016-2019)
  9. Цифрлық даму, қорғаныс және аэроғарыш өнеркәсібі министрлігі (2019)
  10. Дін істері және азаматтық қоғам министрлігі (2016-2018)
  11. Инвестициялар және даму министрлігі (2014-2018)
  12. Денсаулық сақтау және әлеуметтік даму министрлігі (2014-2017)
  13. Мемлекеттік қызмет істері министрлігі (2015-2016)
  14. Индустрия және жаңа технологиялар министрлігі (2010-2014)
  15. Көлік және коммуникациялар министрлігі (1994-1999, 1999-2014)
  16. Қоршаған орта және су ресурстары министрлігі (2013-2014)
  17. Мәдениет министрлігі (1992-1997, 2003-2004, 2010-2012, 2014)
  18. Мұнай және газ министрлігі (2010-2014)
  19. Өңірлік даму министрлігі (2013-2014)
  20. Экономика және бюджеттік жоспарлау министрлігі (2002-2010, 2013-2014)
  21. Қоршаған ортаны қорғау министрлігі (2002-2013)
  22. Экономикалық даму және сауда министрлігі (2010-2013)
  23. Байланыс және ақпарат министрлігі (2010-2012)
  24. Индустрия және сауда министрлігі (2002-2010)
  25. Энергетика және минералдық ресурстар министрлігі (2000-2010)
  26. Мәдениет, ақпарат және спорт министрлігі (2004-2006)
  27. Ақпарат министрлігі (2003-2004)
  28. Мәдениет, ақпарат және қоғамдық келісім министрлігі (1999-2003)
  29. Мемлекеттік кiрiс министрлiгi (1998-2002)
  30. Табиғи ресурстар және қоршаған ортаны қорғау министрлігі (1999-2002)
  31. Экономика және сауда министрлiгi (1997, 2000-2002)
  32. Экономика министрлігі (1993-1997, 1999-2000)
  33. Энергетика, индустрия және сауда министрлiгi (1997-2000)
  34. Ақпарат және қоғамдық келiсiм министрлiгі (1997-1999)
  35. Бiлiм, мәдениет және денсаулық сақтау министрлiгi (1997-1999)
  36. Ғылым министрлiгi - Ғылым академиясы (1996-1999)
  37. Денсаулық сақтау, бiлiм және спорт министрлiгi (1999)
  38. Көлік, коммуникациялар және туризм министрлігі (1999)
  39. Білім министрлігі (1993-1997)
  40. Бiлiм және мәдениет министрлiгі (1997)
  41. Геология және жер қойнауын қорғау министрлiгi (1992-1997)
  42. Еңбек министрлігі (1991-1997)
  43. Жастар iсi, туризм және спорт министрлiгi (1993-1997)
  44. Құрылыс, тұрғын үй және аумақтарда құрылыс салу министрлiгi (1993-1997)
  45. Мұнай және газ өнеркәсiбi министрлiгi (1994-1997)
  46. Өнеркәсiп және сауда министрлiгi (1994-1997)
  47. Халықты әлеуметтік қорғау министрлігі (1992-1997)
  48. Экология және биоресурстар министрлiгi (1992-1997)
  49. Энергетика және табиғи ресурстар министрлiгi (1997)
  50. Энергетика және көмiр өнеркәсiбi министрлiгi (1994-1997)
  51. Ғылым және жаңа технологиялар министрлiгi (1992-1996)
  52. Баспасөз және бұқаралық ақпарат министрлiгi (1991-1995)
  53. Байланыс министрлігі (1991-1994)
  54. Өнеркәсіп министрлігі (1991-1994)
  55. Сауда министрлігі (1991-1994)
  56. Сыртқы экономикалық байланыстар министрлiгi (1991-1994)
  57. Энергетика және отын ресурстары министрлiгi (1992-1994)
  58. Туризм, дене шынықтыру және спорт министрлігі (1991-1993)
  59. Халыққа бiлiм беру министрлiгi (1991-1993)
  60. Ауыл шаруашылығы және азық-түлiк министрлiгi (1991-1992)
  61. Әлеуметтiк қамсыздандыру министрлiгi (1991-1992)
  62. Орман шаруашылығы министрлігі (1991-1992)
  63. Энергетика және электрлендіру министрлiгi (1991-1992)

Комитеттері[өңдеу | қайнарын өңдеу]

Толық мақаласы: Қазақстан комитеттері

Қазіргі құрамы[өңдеу | қайнарын өңдеу]

Толық мақаласы: Олжас Бектенов үкіметі
Лауазымы Суреті Аты-жөні Қызметі

Премьер-министр
Олжас Абайұлы Бектенов 6 ақпан
2024 жылдан бері
Премьер-министр орынбасарлары
Премьер-министрдің
Бірінші орынбасары
Роман Васильевич Скляр 11 қаңтар
2022 жылдан бері
Премьер-министрдің орынбасары —
Үкімет Аппаратының басшысы
Ғалымжан Тельманұлы Қойшыбаев 4 қаңтар
2023 жылдан бері
Премьер-министрдің орынбасары —
Ұлттық
экономика министрі
Нұрлан Серікұлы Байбазаров 6 ақпан
2024 жылдан бері

Премьер-министрдің орынбасары —
Сыртқы істер министрі
Мұрат Әбуғалиұлы Нұртілеу 3 сәуір
2023 жылдан бері
Премьер-министрдің
орынбасары
Серік Мақашұлы Жұманғарин 2 қыркүйек
2022 жылдан бері
Премьер-министрдің
орынбасары
Тамара Босымбекқызы Дүйсенова 11 сәуір
2022 жылдан бері
Министрлер

Қорғаныс министрі
Руслан Фатихұлы Жақсылықов 19 қаңтар
2022 жылдан бері

Ішкі істер министрі
Ержан Сапарбекұлы Сәденов 2 қыркүйек
2023 жылдан бері
Ауыл шаруашылығы
министрі
Айдарбек Сейпілұлы Сапаров 4 қыркүйек
2023 жылдан бері

Әділет министрі
Азамат Несіпбайұлы Есқараев 4 қаңтар
2023 жылдан бері
Ғылым және жоғары
білім министрі
Саясат Нұрбек 11 маусым
2022 жылдан бері
Денсаулық сақтау
министрі
Ақмарал Шәріпбайқызы Әлназарова 6 ақпан
2024 жылдан бері
Еңбек және халықты
әлеуметтік қорғау министрі
Светлана Қабыкенқызы Жақыпова 2 қыркүйек
2023 жылдан бері
Көлік министрі Марат Кәрімжанұлы Қарабаев 2 қыркүйек
2023 жылдан бері
Қаржы министрі Мәди Төкешұлы Такиев 6 ақпан
2024 жылдан бері
Мәдениет және
ақпарат министрі
Аида Ғалымқызы Балаева 2 қыркүйек
2023 жылдан бері

Оқу-ағарту министрі
Ғани Бектайұлы Бейсембаев 4 қаңтар
2023 жылдан бері
Өнеркәсіп және
құрылыс министрі
Қанат Бисимбайұлы Шарлапаев 4 қыркүйек
2023 жылдан бері
Сауда және
интеграция министрі
Арман Абайұлы Шаққалиев 2 қыркүйек
2023 жылдан бері
Су ресурстары
және ирригация министрі
Нұржан Молдиярұлы Нұржігітов 4 қыркүйек
2023 жылдан бері

Төтенше жағдайлар
министрі
Шыңғыс Сайранұлы Әрінов 6 ақпан
2024 жылдан бері
Туризм және
спорт министрі
Ермек Боранбайұлы Маржықпаев 4 қыркүйек
2023 жылдан бері
Цифрлық даму,
инновациялар және аэроғарыш
өнеркәсібі министрі
Бағдат Батырбекұлы Мусин 2 қыркүйек
2020 жылдан бері
Экология және
табиғи ресурстар министрі
Ерлан Нұрәліұлы Нысанбаев 5 қыркүйек
2023 жылдан бері
Энергетика министрі Алмасадам Майданұлы Сәтқалиев 4 сәуір
2023 жылдан бері

Тағы қараңыз[өңдеу | қайнарын өңдеу]

Дереккөздер[өңдеу | қайнарын өңдеу]

  1. 6 тамызда Елбасының қатысуымен Үкіметтің кеңейтілген отырысы өтеді  (қаз.). bnews.kz. Мұрағатталған 21 тамыздың 2014 жылы.
  2. Қазақстанда дін істері және азаматтық қоғам министрлігі құрылды
  3. ҚАЗАҚСТАНДА ЖАҢА МИНИСТРЛІК ҚҰРЫЛДЫ
  4. Денсаулық сақтау және әлеуметтік даму министрлігі екі ведомствоға бөлінді
  5. Қазақстанда Қоғамдық даму министрлігі құрылды
  6. Қазақстанда Индустрия және инфрақұрылымдық даму министрлігі құрылды
  7. Ақпарат және қоғамдық даму министрлігі құрылды
  8. Елімізде Сауда және интеграция, Экология, геология және табиғи ресурстар министрліктері құрылды
  9. ҚР ЦИФРЛЫҚ ДАМУ, ҚОРҒАНЫС ЖӘНЕ АЭРОҒАРЫШ ӨНЕРКӘСІБІ МИНИСТРЛІГІНІҢ АТАУЫ ӨЗГЕРДІ
  10. ЖАҢА ЕКІ МИНИСТРЛІК ҚҰРЫЛДЫ
  11. ҚР Экология және табиғи ресурстар министрлігі құрылды
  12. Тоқаевтың жарлығымен жаңа 5 министрлік құрылады
  13. ҮКІМЕТТІҢ ҚҰРАМЫ  (қаз.). Қазақстан премьер-министрінің ресми сайты. Тексерілді, 31 қазан 2023.

Сыртқы сілтемелер[өңдеу | қайнарын өңдеу]