Құлжан мұнайлы-газ конденсант кен орны

Құлжан мұнайлы-газ конденсант кен орны — Маңғыстау облысы, Бейнеу ауданы, Опорная темір жол стансасынан оңтүстік-батысқа қарай 25 км жерде орналасқан. Құрылым сейсмикалық барлау нәтижесінде ашылып, барлау-іздестіруі нақтыланып, 1976-1986 жылдары бекітілген.

Геологиялық құрылымы

Тектоникалық тұрғысы Каспий маңы ойпатының оңтүстік-шығыс борт (ернеулік) белдемінде, Оңтүстік Ембі (Жем) көтерілімінің периклинальдық бөлігіне жатады, III және V горизонт құрылымдары екі жартылай күмбезден - батыс және шығыс телімдерден тұрады. Олар ендік бағытта созылып жатыр. Бұл жартылай екі күмбездің жер асты биіктігі 2850 м. Олардың аудандары шамамен 9,5х1 км. Ұңғымалар бұрғыланып, бұл екі күмбезден 8 өнім қабаты анықталған. Коллекторлары кеуекті.

Жатыс сипаты

• Юра дәуірі шоғырындағы горизонт:
  • кеуектілігі 18,6-23,8%;
  • өтімділігі 6,4-34,9%;
  • жалпы қалыңдығы 17,3-68,8 м (Ю-IV);
  • тиімді қалыңдығы 1 м-ден (Ю-I) 3,45 м-ге дейін (Ю-Х);
  • шоғырының биіктігі 5,2-23,3 м.;
  • мұнаймен қаныққандығы 0,46-0,67;
  • газбен қаныққандығы 0,65-0,1.
• Төменгі бор шоғырындағы горизонт:
  • кеуектілігі 23-25%;
  • газбен қаныққан тиімді мөлшері 3,5-6,7 м; газбен қаныққаны 0,53;
  • газбен қаныққан қабатының қалыңдығы 325 м.
• Қатқойнаулық қысымының юра және төменгі бор шөгінділерінде 17,6-28,4 МПа.

Құрамы

Юра горизонтындағы мұнай тығыздығы орта және ауыр (876-дан 918кг/м³). Басым бөлігінде оларда күкірті және парафині аз болып келеді (1,9-2,4%).