كىتاپحانا

الانسونداعى كىتاپحانا.

كىتاپحانا — مادەنىي-اعارتۋشىلىق مەكەمە. كىتاپحانا ٴباسپاسوز شىعارمالارىن جىيناۋ، ساقتاۋ، ناسىيحاتتاۋمەن، وقىرماندارعا ٴباسپاسوز شىعارمالارىن بەرۋمەن، مادەنىي-اعارتۋ جانە عىلىمىي-كوپشىلىك جۇمىستارىن ۇيىمداستىرۋمەن شۇعىلدانادى. كىتاپحانا اتقاراتىن مىندەتىنە، كىتاپ قورىنىڭ قۇرامىنا جانە جۇمىس ادىسىنە قاراي ەكىگە بولىنەدى: ا) كوپشىلىك؛ ٴا) عىلىمىي جانە ارناۋلى.

• كوپشىلىك كىتاپحانا — وقىرمانعا قوعامدىق-ساياسىي، كاسىپتىك، جالپى ٴبىلىم بەرەتىن باسىلىمداردى ۇسىنادى.
• عىلىمىي جانە ارناۋلى كىتاپحانالار عىلىم سالالارى مەن بەلگىلى ٴبىر ۇيىمدارعا (مەكەمەلەر، وقۋ ورىندارى، ت.ب.) قىزمەت ەتەدى. كىتاپحانالار جازبا ەسكەرتكىشتەردىڭ قوعامدىق قويماسى رەتىندە ەرتە زاماندا پايدا بولعان. ٴبىزدىڭ زامانىمىزدان بۇرىنعى ۷-عاسىردىڭ ورتاسىندا اسسىيرىييا پاتشاسى اشۋربانىيپالدىڭ سارايىندا قىش تاقتالارعا جازىلعان جازبالار جىيناعى ساقتالعان. كونە كىتاپحانالاردىڭ ىشىندە الەكساندرىييا كىتاپحاناسى الەمگە ايگىلى. ۹ — ۱۱-عاسىرلاردا بۇحارا، سامارقاند، وتىرار، ۇرگەنىش، مەرۆ قالالارى عىلىمىي جانە ادەبىي كىتاپ قورلارىمەن اتى شىقتى. ۇلى عۇلاما ٴال-ٴفارابىيدىڭ تۋعان قالاسى وتىراردا الەكساندرىييادان كەيىنگى الەمدەگى ەكىنشى ەڭ ٴىرى كىتاپحانا بولعان دەپ ەسەپتەلەدى. قازىرگى ۋاقىتتا قازاقستان رەسپۋبلىيكاسىندا بارلىعى ۱۱۳۰۰ كىتاپحانا (۲۰۰۳) جۇمىس ىستەيدى.

كىتاپحانا ٴىسىن جوسپارلاۋ

كىتاپحانا ٴىسىن جوسپارلاۋ - كىتاپحانا ٴىسىن باسقارۋدىڭ كۇرامدى بولىگى - بەلگىلى ٴبىر كەزەڭگە كىتاپحانا ٴىسىن جەتىلدىرۋ، ولاردى جۇزەگە اسىرۋدىڭ قۇرالدارى مەن دامۋ كورسەتكىشتەرىنىڭ ماقساتىن عىلىمىي انىقتاۋ.

كىتاپحانا رەسۋرستارىن جوسپارلاۋ

كىتاپحانا رەسۋرستارىن جوسپارلاۋ - بەلگىلى مەرزىمگە كىتاپحانا رەسۋرستارى دامۋىنىڭ تەندەنتسىيياسى مەن بولاشاعىن انىقتاۋدا ايماقتىڭ (مەكەمەنىڭ) تۇرعىندارىنىڭ بەلگىلى قاجەتتەرىن زەرتتەۋ ارقىلى جۇزەگە اساتىن جوسپارلاۋ.