Абай Құнанбаев - қазақ халқының ұлы ақыны

«Абай Құнанбаев - қазақ халқының ұлы ақыны» (Абай Құнанбаев - великий поэт казахского народа)- Москвадағы «Знание» баспасынан 1954 ж. орыс тілінде жарық көрген зерттеу еңбек. Бүкілодақтық саяси және қоғамдық білім тарату қоғамы шығарған. Авторы - М. О. Әуезов. Еңбекте автор Абайдың жастық шағын, өскен ортасын, өмір сүрген дәуірін сөз ете отырып, сол кездегі қазақ халқының қоғамдық даму сатысын, әлеуметтік жағдайын жан-жақты талдайды. Абай шығармаларын әдеби-теориялық тұрғыдан саралап, оның поэтикасының ұлағатты сырын, тәлім-тәрбиелік жарқын қасиетін ашады. Абай мұраларының бастау алған негізгі қайнар көздеріне тоқталады. Көлемі 1,5 баспа табақ, 72 мың дана болып басылған.