Абай - сатирик

«Абай - сатирик» - ақынның туғанына 125 жыл толуына байланысты «Білім» қоғамынан 1970 ж. жарық көрген кітапша. Авторы - Т. Қожакеев. Автор Абай сатирасының өткірлігін жан-жақты талдайды. Ақын сынының негізгі объектісі мен тақырыбын, өз заманындағы қоғамдық қайшылықтарды, ел билеу жүйесін, ұлық, болыс, әкім пысықтардың жемқорлық айла-амалдарын әшкерелеу әдістері мен шеберлігін сөз етеді. Абай сатирасының жазылу түрі мен тәсілін жіктеп (тұрмыстық, саяси-әлеуметтік, этикалық, моральдық), қазақ әдебиетінде сатира, әзіл-оспақ, сын-сықақ жанрын жаңа түрмен, соны мазмұнмен байыта түскенін ашып көрсетеді. Еңбек әдебиет зерттеушілеріне, лекторларға, студенттерге, жалпы оқырман қауымға арналған. Көлемі 1,7 баспа табақ, 4 мың дана болып басылған.