Адай Есенқұлұлы Маман

Адай Есенқұлұлы Маман (14 қазан 1925 жыл туылды, Ақсу ауданы, Алматы облысы, Қазақстан) — тіл білімі маманы, филология ғылымының кандидаты (1969). 1943-1948 жылдары әскер қатарында қызмет етті. 1948—1953 жылдары Қазақ мемлекеттік ұлттық университетінің филология факультетінің қазақ бөлімінде оқыды. 1953—1958 жылдары Алматы облысы, Талғар ауданы орта мектебінде мұғалім, оқу ісінің меңгерушісі. 1958-1961 жылдары Талғар ауданы партия комитетінде нұсқаушы. 1961—1991 жылдары ҰҒА- ның А. Байтұрсынұлы атындағы Тіл білімі институтында кіші, аға ғылыми қызметкер болып істеді. "Орхон-Енисей жазба ескерткіштеріндегі сөз тудыратын жұрнақтар" деген тақырыпта кандидаттық диссертация қорғады. V—VIII ғасырлардағы түркі жазба нұсқаларының тілі мен қазақ тілінің арасындағы тарихи өзектестікті зерттеп, монография жазды. "Даңқ" ордені, "Ерлігі үшін" және бұдан басқа да Ұлы Отан соғысының медальдарымен марапатталған.