Азалия

Азалия
Ғылыми топтастыруы
Дүниесі: Өсімдіктер Тегі: Азалия

Аза́лия (лат. Azalea) – ерекше күтімді талап ететін бөлме өсімдігі. Ол рододендрон тұқымдасына жатады. Отаны – Қытай елі. Жалпы екі мыңнан астам түрлері бар. Биіктігі түріне байланысты 40 см-ден 3 метрге дейін болады. Жапырақтары жұмыртқа пішіндес, жылтыр жасыл түсті. Гүлдерінің диаметрі 3,5-5 см, түсі негізінен күлгін, қызыл, ақ. Шар тәрізді гүл жарады. Соңғы уақытта азалияның шөмеле және пирамида пішіндес түрлері шығарылды. Азалия қыс бойы, ерте көктемге дейін гүлдеп тұрады. Бірақ ерекше күтімді қажет ететіндіктен, оған үлкен еңбек жұмсау керек. Азалия гүлін сатып аларда екі-үш гүлі ашылғанын таңдаған жөн. Ал, одан арғы жағдайы өзіңіздің қолыңызда, жасаған күтіміңізге байланысты. Сондықтан, жаңадан гүл өсіріп жүрген азаматтарға азалияны өсіруге кеңес бермейміз. Біраз тәжірибе мен білім жинағаннан кейін ғана азалияны өсіруге болады. Азалияның ұзақ гүлдеуі мен дұрыс өсуі үшін оны молынан суғарып, жарық жерге орналастырып және жиі ылғалдандырып тұру керек. Сонымен қатар, гүлдеп біткен гүлсабақтарын өз уақытында кесіп тастаған дұрыс.

Жарығы:

Жарық жерге орналастыру керек. Күннің тіке түскен сәулесінен сақтаған жөн. Алакөлеңкені ұнатпайды.

Жылуы:

Қыс мезгілінде 12-15 °C төмен болмау керек.

Суғарылуы:

Гүлдеп тұрған кезде молынан суғарады. Жаз кезінде балконға немесе аулаға шығаруға болады.

Ылғалдылығы:

Наурыз айынан қыркүйек айына дейін күніне 1-2 рет су шашып тұру керек.

Қоректендірілуі:

Екі-үш аптада бір рет арнайы тыңайтқышпен қоректендіріледі.

Аурулары:

Азалияның негізгі зиянкестері өсімдік биті, өрмекші және саңырауқұлақ ауруы. Олар аз суғарғаннан пайда болады. Жапырақтары жиырылып түсіп қалады. Ылғалдылық аз болса, ұзақ гүлдемейді.

Көбейтілуі:

Маусым, тамыз айларының аралығында қалемше арқылы көбейтеді. Қалемшелерді құм, торф араласқан топырақта тамырландырады. Қалемшенің бетін шынымен жауып, жүйелі түрде су бүркіп тұру керек. Ол екі айдан соң тамырланады. Температурасы 25 °C деңгейінде болуын қамтамасыз ету қажет.

Сілтемелер

• Гүлстан, өсімдіктер туралы сайт Мұрағатталған 20 ақпанның 2012 жылы.

Дереккөздер

"Гүлстан" республикалық ғылыми-танмыдық, көпшілік журнал, 2010 жыл ISSN 2078-6727