Алекс Перейра

Александро Перейра (7 шілде 1987 жылы, Сан-Бернарду-ду-Кампу, Сан-Паулу) — бразилиялық кәсіпқой аралас жекпе-жек (ММА) спортшысы және бұрынғы кикбоксшы. UFC-дің орта салмақтағы бұрынғы чемпионы және жартылай ауыр салмақтағы қазіргі чемпионы. Кикбоксингте ол Glory ұйымының орта және жартылай ауыр салмақтағы бұрынғы чемпионы болып табылады. Сондай-ақ It’s Showtime және SUPERKOMBAT Fighting Championship сияқты промоушендерде өнер көрсеткен. UFC-дің салмақ дәрежесіне тәуелсіз (pound-for-pound) ең мықты спортшыларының ресми рейтингінде 3-орында тұр.

Биографиясы

Алекс 1987 жылы 7 шілдеде патаксо тайпасынан шыққан үндістердің тамыры бар кедей бразилиялық отбасында дүниеге келген. Бразилиядағы фавела деп аталатын кедей аудандарда өмір сүру оны ерте есейтіп, 12 жасында мектепті тастап, шиналар дүкенінде жұмыс істеуге мәжбүр етті. Ол сол ортаға бейімделіп, ішімдікке әуестеніп, жасөспірім шағында маскүнемдікке салына бастады. Осы зиянды әдеттен арылу үшін Алекс кикбоксингпен айналыса бастады.

Кикбоксингтегі карьерасы

Алекс Перейра 2014 жылы 8 наурызда Хорватияның Загреб қаласында өткен Glory 14: Zagreb — Contender Tournament турниріне орта салмақта қатысты. Ол жартылай финалда Дастин Джейкобиді бірінші раундта нокаутпен жеңіп, финалда Саак Парпарянды төрешілердің басым шешімімен ұтты.

Glory 15: Istanbul турнирінің тікелей эфирінде Перейраның Glory 17: Los Angeles — Last Man Standing турниріне қатысатыны жарияланды. Бұл жарыс 2014 жылы 21 маусымда Калифорниядағы Инглвуд қаласында өтті. Алайда, Перейра ширек финалда болашақ чемпион Артем Левинге төрешілердің бірауызды шешімімен ұтылып, жарыстан шығып қалды.

Перейра WGP Kickboxing 25 турнирінде орта салмақтағы бос тұрған WGP титулы үшін Сезар Алмейдамен реванш өткізуі керек болды. Ол жекпе-жекті төрешілердің шешімімен жеңіп, чемпиондық белбеуді иеленді. Кейін WGP KB 40 турнирінде Маикон Силваны екінші раундта нокаутпен жеңіп, өз титулын қорғады.

Келесі бес жекпе-жегінде Перейра тек Артур Кишенкоға ғана жеңілді. Бірақ осы кезеңде ол ең атақты жеңістерінің біріне қол жеткізді – болашақ UFC орта салмақ чемпионы Исраэль Адесаньянды екі рет жеңді: біріншісінде төрешілердің бірауызды шешімімен, екіншісінде сол қолмен қарсы соққы жасап, нокаутпен ұтты.

Алекс Перейра Glory 46: China турнирінде Саймон Маркусты төрешілердің бірауызды шешімімен жеңіп, Glory орта салмақтағы чемпиондық титулын иеленді.

Glory Light Heavyweight Championship

Алекс Перейра Glory 40 және Glory 49 Superfight Series турнирлерінде Юсри Белгаруимен кездескен. Кейін 2018 жылы Нью-Йорктегі Madison Square Garden аренасында өткен Glory 55 турнирінде екеуі тағы да орта салмақтағы чемпиондық титул үшін жекпе-жек өткізді. Бұл жекпе-жекте Белгаруи бірінші раундтың 2 минут 29 секундында нокаутқа түсті. Бұл Перейраның мансабындағы 28-ші жеңісі және Glory рингіндегі 6-шы жеңісі болды.

2018 жылдың қарашасында Перейра Glory ұйымымен келісімшарты 2019 жылдың сәуірінде аяқталғаннан кейін ММА-ға ауысатынын мәлімдеді. Алайда, кейін Glory-мен жаңа келісімшартқа қол қойып, аралас жекпе-жек өнерінде (ММА) де жарысқа шығу мүмкіндігін алды.

Орта салмақтағы төрт титулдық қорғаудан (Юсри Белгаруи, Саймон Маркус, Джейсон Уилнис) кейін Перейра Glory 68 турнирінде Донеги Абенамен уақытша жартылай ауыр салмақтағы чемпиондық титул үшін жекпе-жек өткізді. Перейра үшінші раундта нокаутпен жеңіске жетіп, Glory тарихындағы екі салмақта чемпион атанған алғашқы файтер болды.

Жартылай ауыр салмақта чемпион атанғаннан кейін, Перейра 2019 жылдың 21 желтоқсанында өткен Glory Collision 2 турнирінде Эртугрул Байракқа қарсы орта салмақтағы белбеуін қорғады. Перейра бірінші раундта толық басымдық көрсетіп, раунд соңында нокаутпен жеңіске жетті.

Перейра Glory 77 турнирінде жартылай ауыр салмақтағы чемпиондық титул үшін Артем Вахитовқа қарсы шықты. Бұл жекпе-жек бөліп шешім қабылдау арқылы (split decision) Перейраның пайдасына шешіліп, ол GLORY тарихында екі белбеуді қатар иеленген алғашқы чемпион атанды.

Алайда, көп ұзамай Перейра орта салмақтағы титулынан айырылды.

Перейра Glory 78: Rotterdam турнирінде Артем Вахитовпен реванш өткізді. Бұл Перейраның жартылай ауыр салмақтағы титулды бірінші рет қорғауы болатын. Жекпе-жек көпшілік шешімімен (majority decision) аяқталды, және төрешілер жеңісті Вахитовқа берді. 4-ші раундта Перейраның клинчке жиі барғаны үшін 1 ұпай шегерілді, бұл рефери тарапынан даулы шешім ретінде бағаланды.

Аралас жекпе-жек мансабы

Кикбоксингтен аралас жекпе-жекке ауысқан Алекс Перейра 2015 жылы ММА-да дебют жасап, алғашқы жекпе-жегінде сабмишнмен жеңіліске ұшырады. Алайда кейін қатарынан екі жеңіске жеткеннен кейін, ол 2018 жылдың 10 тамызында Dana White's Contender Series Brazil турнирінде Диего Энрике да Силвамен жекпе-жек өткізетінін мәлімдеді. Бірақ бұл кездесу Glory ұйымының рұқсат бермеуіне байланысты өтпей қалды.

2020 жылдың 22 қазанында Перейраның Legacy Fighting Alliance (LFA) ұйымымен келісімшартқа отырғаны туралы жаңалық тарады. 2020 жылдың 20 қарашасында ол LFA-дағы алғашқы жекпе-жегін Томас Пауэллға қарсы өткізді. Перейра бірінші раундта нокаутпен жеңіске жетті.

UFC-дегі мансабы

2021 жылдың 3 қыркүйегінде Алекс Перейра UFC-мен келісімшартқа отырды.

2021 жылдың 6 қарашасында ол UFC 268 турнирінде Андреас Михайлидиске қарсы дебют жасады. Екінші раундта Перейра секіріп тіземен соққы жасап, қарсыласын нокаутқа жіберді. Осы жеңісі үшін ол "Кештің үздік орындауы" бонусын алды.

2022 жылдың 12 наурызында Перейра UFC Fight Night: Santos vs. Ankalaev турнирінде Бруну Силвамен кездесті. Барлық үш раундта басымдық танытып, бірауыздан судьялар шешімімен (30–27, 30–27, 30–27) жеңіске жетті.

2022 жылдың 2 шілдесінде UFC 276 турнирінде Перейра Шон Стриклэндті бірінші раундта нокаутқа түсірді. Бұл жеңіс оған екінші рет "Кештің үздік орындауы" бонусын алып келді.

2022 жылдың 13 қарашасында Перейра UFC 281 турнирінің басты жекпе-жегінде орта салмақтағы чемпион Исраэль Адесаньямен титулдық кездесуге шықты. Бесінші раундта техникалық нокаутпен жеңіске жетіп, UFC чемпионы атанды. Бұл оның төрт жекпе-жектің үшеуінде алған "Кештің үздік орындауы" бонусы болды.

2023 жылдың 8 сәуірінде Перейра UFC 287 турнирінде Адесаньямен реванш өткізіп, екінші раундта нокаутқа түсті.

2023 жылдың 11 қарашасында UFC 295 турнирінде Перейра Иржи Прохазканы екінші раундта нокаутпен жеңіп, жартылай ауыр салмақта UFC чемпионы атанды.

2024 жылдың 13 сәуірінде Перейра UFC 300 турнирінің басты жекпе-жегінде Джамаал Хиллмен кездесті. Төртінші минутта қарсыласын нокдаунға жіберіп, жерде ұрып тастап, чемпиондық белдігін қорғап қалды.

2024 жылдың 29 маусымында UFC 303 турнирінде Перейра Иржи Прохазкамен қайта кездесіп, екінші раундта техникалық нокаутпен жеңіске жетіп, титулын қорғады. Бастапқыда бұл турнирдің басты жекпе-жегі Конор МакГрегор мен Майкл Чендлер арасында өтуі керек еді, бірақ МакГрегор жарақатына байланысты жарыстан шығып қалды. Осыған байланысты Перейра мен Прохазка негізгі жекпе-жекті өткізуге келісім берді.