Алматы кілем

"Алматы Кілем" — Алматы қаласындағы кілем және тоқыма бұйымдарын шығаратын кәсіпорын.

1936 ж. “Ковровщица” артелі негізінде құрылған. 1960 ж. Алматы кілем-тоқыма фабрикасы, 1972 ж. Алматы кілем фабрикасы болып өзгертілді. 7 негізгі және қосалқы цехтары бар. 1962 ж. қол тоқыма станоктары механикалық тоқыма станоктарымен алмастырылды. Негізгі өнім түрлері: машинамен тоқылатын ірі өрнекті кілемдер (4 түсті, 2 түсті түкті), қолмен тоқылатын түкті кілемдер; төсеніш кілемшелер. Фабрика арнайы тапсырыстар бойынша Абай, Жамбыл, М.Әуезов, С.Сейфуллин, С.Мұқанов т.б. әдебиет және өнер қайраткерлері бейнеленген портретті кілемдері де шығарып келді.

Кәсіпорын 1992 ж. “Алматы кілем” акционерлік қоғамы болып қайта құрылды. Өнімдері шет елдерге де шығарылады.