Алмаши Дьордь

Алмаши Дьордь (Almasy GyorQy) (1867, Мажарстан, Фолшолендва қ. — 1933, Аустрия, Грац қ.) — шығыстанушы, географ, орнитолог. Алмаши Дьордь бастаған экспедиция 1900 ж. наурыз — желтоқсан айларында Қазақстанның бірқатар жерлерінде болып, этногр., географиялық зерттеулер жүргізген. 1903 ж. жарық көрген “Азия жүрегіне сапарым” (“Vandorutam Azsіa szіvebe”) атты еңбегінде Жетісу, Алатау, Тянь-Шань өңірінің географиялық жағдайы, жан-жануарлар дүниесі, гидрология жүйесі, Түркістанның саяси-әлеум., экономикалық өмірі, ондағы жергілікті тұрғындар мен келімсек халықтардың арасындағы қарым-қатынас жөнінде көптеген деректер бар. Қазақтар мен қырғыздардың тілі, діні, әдет-ғұрпы, шаруашылығына қатысты мәліметтер берілген. Алмаши Дьордь 1912 ж. Еуропада алғаш рет “Манас” дастанының үзіндісін жариялады. Алмаши Дьордьнің қазақ және қырғыз этнографиясы туралы жинаған құнды деректері Мажар этнография мұражайында сақталуда.