Апаттар медицинасының теміржол госпитальдары

"Апаттар медицинасының теміржол госпитальдары" акционерлік қоғамы - "АМТГ" АҚ (орыс. АО "Железнодорожные госпитали медицины катастроф" - АО "ЖГМК") - ҚР Төтенше жағдайлар министрлігі қарамағындағы ұйым болып табылады. Құрамында 19 филиал, оның ішінде: 16 көп салалы ауруханалар, 2 поликлиника және Оқу-тренингтік орталық кіреді.

Қоғамның құрылуы

Қазақстанның тәуелсіздік алуы, қоғамдық қатынастардың барлық негіздерін терең қайта құру, табиғи және техногенді сипаттағы төтенше жағдайлардың көбеюі бүкіл әлем тұрғындары мен аймақтарды қорғау жүйесін өзгертулер нәтижесінде Қазақстан Республикасы Үкіметінің 2009 жылғы 22 қазандағы «Қазақстан Республикасы Төтенше жағдайлар министрлігінің қарамағындағы акционерлік қоғамдардың кейбір мәселелері туралы» № 1642 қаулыcына сәйкес, «Орталық жол ауруханасы», «Көліктің медицина қызметі» және «Университет клиникасы» акционерлік қоғамдарын біріктіру арқылы «Апаттар медицинасының темір жол госпитальдары» акционерлік қоғамы құрылды.

Қоғамның құрылымы

ҚР ТЖМ «Апаттар медицинасының темір жол госпитальдары» АҚ Астана қаласында орналасқан орталық аппараттан және Қазақстан Республикасының барлық аймақтарында орналасқан медициналық ұйымдар жүйесінен құралған 19 филиалдан тұрады. Қоғамды м.ғ.д. Серік Ұғанұлы Данбаев басқарады.

Қоғамның әр филиалы құрамында аурухана, емхана, фельдшерлік пункттер, медициналық пункттер, сауықтыру пункттері, рейс алдындағы және ауысылым алдындағы медициналық тексеру жүргізетін пункттері, қосымша бөлімшелері бар емдеу-диагностикалық кешен болып табылады. Бұл компанияға өз қызметін еліміздің барлық аймақтарында жүзеге асыруға мүмкіндік береді. Осы жағдай акционерлік қоғамды басқа медициналық ұйымдардан ерекшелендіреді, көптеген медициналық ұйымдар бір облыс немес аймақтың көлемінде ғана қызмет көрсетеді.

2010 жылғы наурызда Алматы қаласында орналасқан Оқу-тренингтік орталықтың тұсауы кесілді. Бұл орталық көрсететін қызметтің негізгі түрі білім беру болып табылады, атап айтқанда: -медициналық және медициналық емес кадрларды табиғи және техногенді сипаттағы төтенше жағдайларда халыққа медициналық жәрдем көрсету мәселелері бойынша дайындау және біліктіліктерін жетілдіру; -ТЖ жоюға қатысушыларды оқыту бағдарламаларын енгізу және жетілдіру; -халықты төтенше жағдайларды жою барысында алғашқы медициналық жәрдем көрсету жөніндегі шебер және дұрыс қимылдар қолдануға үйрету.

Қоғамның негізгі қызмет түрлері

• медициналық қызмет;
• сот сараптамасымен байланысты емес медициналық сараптама қызметі;
• темір жол кәсіпорындары қызметін медицинамен қамтамасыз ету;
• төтенше жағдайлардан зардап шеккен жолаушыларға, жылжымалы құрам жұмыскерлеріне және халыққа медициналық жәрдем көрсету
• Қазақстан Республикасының Төтенше жағдайлар министрлігі құрылымдарының жеке құрамын бастапқы медициналық жәрдем бағдарламасы бойынша оқыту;
• медициналық қондырғылар мен техникаларды жеткізу, монтаждау, қызмет көрсету, медициналық қызметкерлерді медициналық қондырғылар, құралдармен жұмыс істеуге үйрету;
• медициналық қызмет саласында жаңа медициналық технологияларды, диагностикалау мен науқастарды емдеудің түрлері және әдістерін әзірлеу, енгізу және жетілдіру;
• денсаулық сақтау саласында комиссиялық, кеңестік, білім беру қызметтерін, сонымен қатар менеджмент, маркетинг және инжиниринг қызметтерін көрсету;
• денсаулық сақтау саласында темір жолшыларға емдеу алдын-алу бойынша жәрдем көрсету, поездардың қауіпсіз қозғалысын қамтамасыз ету және темір жол көліктеріндегі төтенше жағдайлардың медициналық зардаптарын жою мәселелері бойынша ТМД елдері темір жол әкімшіліктерінің өзара әрекет ету жөніндегі Комиссия шеңберінде халықаралық қарым-қатынастар жасау;
• Алматы мемлекеттік дәрігерлердің білімін жетілдіру институтында біліктілігін жоғарылатқандығы жөніндегі куәлік бере отырып төтенше жағдайлардағы әрекеттермен алғашқы медициналық жәрдем көрсету жөніндегі курстар өткізу;

Қоғамды дамыту және қайта-құрудың негізгі нәтижелері

Қоғамның филиалдары күрделі процедуралар, сонымен қатар абдоминальды хирургия, ринохирургия, гинекология салаларында «қан шығармай» операция жасауға мүмкіндік беретін заманауи емдеу-диагностикалық техникаларымен жабдықталған. Қазіргі уақытта таяу және алыс шет елдердің озық ғылыми-медициналық орталықтарынан кеңес алуға, семинарлар, конференциялар, медициналық қызметкерлер үшін оқыту курстарын өткізуге мүмкіндік беретін телемедициналық технологиялар енгізілуде. Барлық филиалдарда эндобейнехирургиялық технологиялар енгізілді. Қарағанды филиалында сирек кездесетін буындарды эндопротездеу және торакоабдоминалды операциялар жасалады. Көкшетаудың галотерапия бөлімінде және Павлодар филиалының фитокабинетінде тыныс жолдары жүйесінің ауруларынан кейін сауығуға және созылмалы аурулардан айығуға жәрдем көрсетіледі. Барлық филиалдарда күнделікті емдеу-диагностикалық тәжірибеге иммуноферментті диагностика (гормональды спекрді зерттеу, бактериологиялық және басқа зерттеулер), неврология, гинекология, кардиология, хирургия, травматологияда тексеру мен емдеудің жаңа әдістері енгізілуде. 2009 жылы Қостанай филиалында клиника-диагностикалық орталығының жаңа корпусы іске қосылды, Семей филиалында төсек орын көбейтілді, жоғарыда баяндалғандай Алматы қаласындағы филиал базасында, құрамында бала бақша, емхана және емдеу-сауықтыру орталығы бар Балалар денсаулығы орталығын құру жобасы жүзеге асырыла бастады, оқу-тренингтік орталықтың тұсауы кесілді. Астана қаласының Орталық жол ауруханасы, біздің бас филиалымыздың хирургиялық және емханалық корпустары жөндеуден өтті, медициналық құралдар мен медициналық жиһаздар сатып алынды, қолда бар құралдарға жөндеу жүргізілді, медициналық қызметкерлердің біліктіліктері жоғарылатылды. «Апаттар медицинасының темір жол госпитальдары» АҚ және «Қазақстан темір жолы» АҚ кеңестік-диагностикалық пойызын құру жөнінде меморандум жасады. Жобаның мақсаты –қашықтағы стансалар мен бекеттерде тұратын теміржолшылар мен олардың отбасы мүшелеріне мамандандырылған және жоғары білікті медициналық жәрдем көрсету болып табылады. Сондай ақ, бұл пойыздың мақсаты ірі көлемдегі төтенше жағдайларда істен шығып қалған денсаулық сақтау ұйымдарының орнына, қажет болған жағдайда көпсалалы мобильді госпитальды базаға айналып, зардап шеккендерге мамандандырылған медициналық жәрдем көрсету болып табылады. 2010 жылдың шілде айында алғашқы "Денсаулық" пойызы іске қосылды. Сонымен қатар, қазіргі кезде Қазақстан аумағында "Жәрдем" және "Саламатты Қазақстан" атты кеңестік-диагностикалық пойыздары халыққа медициналық көмек көрсетуде.