Аралық дақыл

Аралық дақыл – ауыспалы егістегі негізгі дақылдардан уақытша бос қалған жерге егілетін дақыл. Аралық дақылды ауа райы мен өсімдіктің биол. ерекшелігіне байланысты ерте пісетін дақыл өнімі жиналғаннан кейін ауа температурасы 5°С-тан жоғары болатын аймақта егеді. Қазақстанда жаздық бидайды, тарыны жинап алғаннан кейін 104 – 187 күн, күздік бидайдан кейін 84 – 167 күн, арпадан, сүрлемдік жүгеріден кейін 124 – 187 күн жылы болады да, олардың орнына Аралық дақыл егіледі. Аралық дақылға негізінен судан шөбі, жоңышқа, жүгері, жаздық сиыржоңышқа, т.б. жатады. Олар топырақтағы органикалық заттар мөлшерін көбейтеді, оның физикалық, химиялық құрамын жақсартады және ылғалдылығын сақтайды. Аралық дақыл көбіне Алматы, Жамбыл, Түркістан облысы және Қызылорда облыстарында егіледі. ^[1]