Қорғалжын (көл)

Қорғалжын – Нұра алабындағы көл. Ақмола облысының Қорғалжын ауданында. Теңіз деңгейінен 307,5 метр биіктікте орналасқан. Ауданы 330 км2, ұзындығы 33 километр, ені 21 километр, орташа тереңдігі 1,6 метр, ең терең жері 3 метр, суының мөлшері 0,5 км3-ге жуық. Су жиналатын алабы 55 мың км2. Солтүстік және шығыс жағасы жарқабақты, батыс және оңтүстік бөлігі жайпақ. Алабының көпшілік жері егістік, қалған жері жайылым. Нұра өзені және көктемгі қар, жауын-шашын суымен толығады. Суының минералды 0,7 – 3,5 г/л. Балық (тұқы, мөңке, алабұға, шортан, аққайран, т.б.) көп. Жағалауында аққу, бірқазан, барылдауық үйрек, балшықшы, т.б. құстар, қамыс арасында жабайы шошқа кездеседі. Қорғалжын және Теңіз көлдерінде Қорғалжын қорығы ұйымдастырылған.

Дереккөздер

Қазақ энциклопедиясы