Аллигаторлар

Аллигаторлар, аллигатор тәрізділер (Allіgoterіdae) — қолтырауын отрядының үш тұқымдасының бірі. Аллигаторлар төрт туыс (Allіgator, Caіman, Melanosuchus және Paleosuchus), 7 түрге бөлінеді. Оның үшеуін (Caіman, Melanosuchus және Paleosuchus) “каймандар” деп атайды. Денесінің ұзындығы 1,5-6,3 м, салмағы 85 кг-ға дейін жетеді. Тұмсығы жалпақтау, әрі қысқа, алдыңғы аяқтарының саусақтары арасында терілі жүзу жарғағы болады. Аналықтары 20-60 жұмыртқасын арнайы жасалған ұяға салады. Аталықтары өздері тіршілік ететін жерлерді қорғайды, ұрпақтарына қамқорлық жасайды. 85 жылдай өмір сүреді. Ересектері балықтармен, бақалармен т.б. омыртқалы жануарлармен, балалары ұсақ су жәндіктерімен қоректенеді. Аллигаторлар— Солтүстік, Оңтүстік Американың, Қытайдың тұщы су айдындарында тіршілік етеді. АҚШ-та, Кубада Миссисипи Аллигаторларын арнайы фермаларда қолдан өсіреді. Қытай Аллигаторлары — Янцзы өзенінің төменгі сағасында таралған. Аллигаторлар бағалы терісі үшін ауланады. Санының күрт азаюына орай, қатаң қорғауға алынып, Халықаралық табиғат қорғау одағының “Қызыл кітабына” енгізілген.

Пайдаланылған әдебиеттер

Қазақ энциклопедиясы