Семей жәрмеңкесі

СЕМЕЙ ЖӘРМЕҢКЕСІ — 18 ғ-дың 2-жартысы мен 20 ғ-дың басында Семей уезінде ұйымдастырылған сауда орталығы. 18 ғ-дың басынан-ақ Семей өңіріне Жаркент, Қашқар, Құлжа қ-нан сауда керуендері келе бастады. 20 ғ-дың басында Семей обл-нда 28 жәрмеңке жұмыс істеді. Олардың ішіндегі сауда айналымы жағынан ең ірісі Қоянды жәрмеңкесі, сондай-ақ Павлодар у-ндегі Покров, Златаустов, Семей у-ндегі Екатерина және Шар жәрмеңкелері. 1907 ж. Семей обл-ның жәрмеңкелерінде 2103945 сомның әр түрлі тауарлары мен малы сатылды, ал 1913 ж. бұл көрсеткіш 3710397 сомға жетті. Жәрмеңкелерде өнеркәсіп және а. ш. өнімдері, тірі мал мен мал ш-ның өнімдері сатылды. Мәселен, 1903 ж. Семей өңірі жәрмеңкелерінің сауда айналымының 34%-нан астамы өнеркәсіп өнімдерінің үлесіне, 24%-ы мал ш. өнімдерінің үлесіне тиді. С. ж-нде малдың көптігіне таңғалған белгілі саяхатшы Аткинсон: “Семейде мал өткізушімен таныстым. Ол саудаға салуға 300 жылқы, 7 мың бұқа, 20 мың қой айдап келіпті. Мұның жалпы бағасы 100 мың сом” деп жазды. С. ж-нде сауда екі түрлі жолмен ақша және тауар айырбастау арқылы жүрді. Айырбас бірлігіне тоқты мен ісек жүрді. С. ж-не Ресейден және Орт. Азиядан мата, қант, тұрмыстық және өнеркәсіп бұйымдары, әшекей заттар әкелінді. Семей өңіріндегі жәрмеңкелердің кейбіреуі Кеңес үкіметінің алғашқы жылдарында да жұмыс істеді.