Сена

СЕНА (Seіne) — Францияның солт-ндегі өзен. Ұз. 776 км, су жиналатын алабының аум. 78,6 мың км2. Лангр үстіртінен басталып, Ла-Манш бұғазының Сена қойнауына эстуарий жасап құяды. Негізгі салалары: Обь, Марна, Уаза (оң), Йонна, Эр (сол) өзендері. Негізінен жаңбыр суымен толығады; қараша — наурыз айларында деңгейі көтеріліп, тасқындар болып тұрады. Орташа жылдық су ағымы Париж қ. маңында 250 м3/с, сағасында 400 — 500 м3/с. Теңіздік толысу өзенмен жоғ. қарай 35 км-ге (Руан қ-на дейін) таралады, Каналдар арқылы Сомма, Шельда, Самбр, Луара, Маас, Рейн, Сона өзендерімен жалғасқан. С. Францияның өнеркәсіпті аудандарын Атлант мұхитымен жалғастыратын маңызды су жолы. Труа қ-нан сағасына дейін кеме жүзеді. С. бойында Париж, Руан қалалары, сағасында Гавр порты орналасқан.