Наурыз хан

Наурыз хан, Наурыз ибн Мұхаммед, Навруз, Наурус, Ноуруз (туылған жылы белгісіз – 1360) – Алтын Орданың ханы (1360 жылы, қаңтар – маусым). Шығу тегі белгісіз, кейбір деректер бойынша Бату немесе оң қанаттағы билеуші әулеттердің бірінің ұрпағы. Ол Жәнібектің бәйбішесі Тайдұлу бегім мен оның жақтастарының қолдауымен Бердібектің мұрагері Күлна хан және оның екі баласы Михаил мен Иванды өлтіріп, билікке келген. Наурыз хан 1358 – 59 жылдары өз атынан күміс, мыс теңгелер соқтырды. Бұл теңгелерде оның Мұхаммед деген мұсылманша аты жазылған. 1360 жылдың ортасында Тайдұлу бегім бастаған топ енді Шайбани әулетінен Қызырды (Хызыр) хан етіп көтерді. Алайда Қызыр билікке келген соң Наурыз ханға қоса Тайдұлу бегімнің өзін де өлтірді. Осы кезден бастап Алтын Ордада шайбани әулеті мен Ақ Орда билеушілерінің рөлі артты.

Сілтемелер

• Алтын Орда
• Ақ Орда
• Шайбани әулеті
• Жәнібек