Шерубайнұра

Шерубайнұра — Қарағанды облысының Шет, Абай, Бұқар жырау аудандары аумағындағы өзен. Ұзындығы 281 км, су жиналатын алабы 15600 км². Сарыарқаның орталық бөлігіндегі Қызылтас тауларының батысындағы бұлақтардан басталып, Ынтымақ бөгенінен 4 км жоғарыда Нұра өзеніне құяды. Аңғары кең, арнасы жарлы. Өзен алабында жер бетіне шығып жатқан ежелгі тау жыныстары кездеседі. Бойында Қотыр Қызылтау, Қотыртас, Бұғылы қыратты шоқылары бар. Жауын-шашын, жер асты суымен толығады. Шерубайнұраға 12 сала құяды. Негізгі салалары: Қарамыс, Талды, Тұматай, Қызылқой, Топар, Соқыр. Көп жылдық орташа су өтімі Шерубайнұра ауылы тұсында 5,04 м³/с. Өзен суы Жартас, Краснополянское, Шерубайнұра бөгендерімен реттелген. Алабында 14,1 мың га суармалы жер бар.

Нұра өзеннің сол жақ саласы. Ұзыны — 231 км, су жиналатын алабы — 15,6 мын км2. Ендірек жері — 10 м, еңтерең тұсы —1.4 м. Қызылтас тауының батыс сілемдерінен басталып, Абай және Бұқар жырау аудандары жерімен ағып өтеді. Өзен алабында жоталар мен төбе кейпінде жер бетіне шығып жаткан кене жыныстар кездеседі. Қотыр Қызылтау, Қотыртас, Бұғылы қыраттары бар. Қар суымен көректенеді. Сәуір айының басында суы тасиды. Мұзы 120-150 тәулік жатады. Топар кентінің жанында Шерубай-Нұра бөгені салынған (1960). Суында торта, аққайраң, алабұға мөңке, шортан, оңғак, шаян тіршілік етеді.

Пайдаланылған әдебиеттер

• Қазақ энциклопедиясы, 9 том
• Қарағанды. Қарағанды облысы: Энциклопедия. - Алматы: Атамұра, 2006. ІSBN 9965-34-515-5