Арыстанбек Нұрмаханұлы Нұрмаханов

Арыстанбек Нұрмаханұлы Нұрмаханов (1. 1. 1973 жылы туған, Алматы қаласы) — тіл білімі маманы, филология ғылымдарының кандидаты (1994), доцент (1997). Алматы педагогикалық шетел тілдері институтын бітірген (1992). 1992-1996 жж. жоғары оқу орнында ағылшын тілін оқыту кафедрасының оқытушысы, аға оқытушысы, доценті. 1996 жылдан осы оқу орнында халықаралық қатынастар факультетінде ағылшын тілі, теориялық және қолданбалы лингвистика кафедраларының меңгерушісі. 2000 жылдан халықаралық қатынастар факультетінің деканы. 2001-2004 жж. Қазақстан Республикасы Мәдениет, ақпарат және қоғамдық келісім министрлігінде тілдерді дамыту департаментінің директоры. 2004-2012 жж. - іскерлік саласында. 2012 жылдан Қазақстан Республикасы Президентінің Әкімшілігінде - Мемлекеттік хатшы хатшылығы меңгерушісінің орынбасары. 2013 жылдың 18 ақпанынан Қазақстан Республикасы Мәдениет және ақпарат министрлігінде Ақпарат және архив комитеті төрағасының орынбасары.

"В.В.Радлов еңбектеріндегі түркі мақал-мәтелдерінің лексика-грамматикалық сипаты" деген тақырыпта кандидаттық диссертация қорғады. 1995-1996 және 1997-2000 жж. дарынды жас ғалымдарға арналған мемлекеттік ғылыми стипендияның иегері. 2000 жылы жас ғалымдарға арналған М. Әуезов атындағы сыйлыққа ие болды. 1 монография, 1 аударма кітап, 1 сөздік, 1 әдістемелік құрал, 30 ғылыми және ғылыми-әдістемелік мақаланың авторы.

Шығармалары:

• В. В. Радлов еңбектеріндегі түркі мақал-мәтелдерінің лексика-грамматикалық сипаты. КДА., А., 1994;
• Әлеуметтік саяси мәтіндермен жұмыс істеу әдістемесі (ағылшын тілі факультеріне арналған оқу-әдістемелік кұрал. А., 1996;
• Казахско-русско-английский словарь экономических терминов рыночной экономики. А., 1997 (авторлардың бірі);
• Түркі фразеологиясы. А., 1998.