Ақкөл ауылдық округі (Атырау облысы)

Уикипедия — ашық энциклопедиясынан алынған мәлімет
Навигацияға өту Іздеуге өту
Қазақстан ауылдық округі
Ақкөл ауылдық округі
Облысы

Атырау облысы

Ауданы

Құрманғазы ауданы

Округ орталығы

Ақкөл

Енеді

1 ауыл

Тұрғыны (2009)

4596

Әкімі

Әлімбай Насихатұлы Әбдірахман

Округ әкімдігінің мекенжайы

Ақкөл ауылы, Иманов көшесі, №36

Уақыт белдеуі

UTC+5:00

Автомобиль коды

06

Телефон коды

+771233

Пошта индексі

060401

Disambig gray.svg Басқа мағыналар үшін Ақкөл ауылдық округі деген бетті қараңыз.

Ақкөл ауылдық округіАтырау облысы, Құрманғазы ауданындағы әкімшілік бірлік.

Әкімшілік құрамы[өңдеу | қайнарын өңдеу]

Құрамына Ақкөл ауылы кіреді. Орталығы – Ақкөл ауылы[1].

Халқы[өңдеу | қайнарын өңдеу]

2009 жылғы санақ бойынша округте 4596 адам тұрады[2]. 13 батыр ана, 7 алтын алқа, 12 күміс алқа иелері бар.[3]

Тарихы[өңдеу | қайнарын өңдеу]

Осы өңірде алғаш теміржол құрылысы 1965 жылы жол табанына топырақ төгу жұмыстарымен басталып, 1969 жылы құрылыс жұмыстары аяқталып станса пайдалануға берілді. Осы жылы Гурьев-Астрахан темір жолының бойынан Ганюшкин бекетін ашу белгіленуіне орай 1970 жылы жергілікті ауылдық кеңес болып құрылды.

Сипаттамасы[өңдеу | қайнарын өңдеу]

Окургтің жер көлемі 1621 га, ондағы көлемі 11 га, шабындық 91 га, жайылым жер 498 гектарды құрайды. Халықтың негізгі бөлігі теміржол саласында, қалғаны округ көлеміндегі әртүрлі заңды тұлғалар мен шаруашылық субьектілерінде және басқа да бюджеттік мекемелерде жұмыс жасайды.

Инфрақұрылымы[өңдеу | қайнарын өңдеу]

Округ бойынша ауыл көшелеріне 6 ашық шағын алаңдары мен 5 балалар ойын алаңдары салынып, құралдарымен жабдықталған. Ангарлы типтегі жабық спорт нысаны қолданысқа берілді. Округке қарасты желілік, өндірістік басқарма машинистер депосы, теміржол жұмысшыларын жабдықтау бөлімшесі, теміржол мекемелері, тұрғындарды сумен қамту мекемесі, электр қуатымен қамту, жабдықтау дистанция бөлімшесі, вагондарды техникалық жабдықтау бөлімі, Ганюшкин жол дистанциясы, теміржол стансасы жұмыс жасайды.

Округ әкімдері[өңдеу | қайнарын өңдеу]

Темірбек Хисамеденұлы Қаспанов, Сұлушаш Үрішова, Махмут Бисұлтанұлы Бисұлтанов, Валентина Ильинична Светикова, Смагұлов Зинеден Ахметжанұлы, Талғат Ғаділбекұлы Нұртазин, Сәуірбай Ахметұлы Ахметов, Талғат Ғаділбекұлы Нұртазин, Бисембай Кәрімұлы Рамазанов[4]

Аққөл ауылдық округінің жер-су атаулары[өңдеу | қайнарын өңдеу]

Ақкөл ауылдық округін өңірдегі басқа округтерден ерекшелейтін бірден-бір қасиеті ылғи көлдердің қоршауында тұр. Округтің шығыс оңтүстігінен батыс бағыты - Д.Нұрпейісова бекетіне дейінгі аралықта тарихи атау иеленген бірнеше көлдері бар.

«Ақкөл» — Ганюшкино станциясының терістігінде үш шақырымдай жерден басталып, ұзындығы 20 шақырым, ені 1 шақырымдай алқапты алып жатырған орын. Өткен ғасырдың елуінші жылдарына дейін көктемгі өр суы келгенде толып, күзде тартылып, қыста көлемі кішірейіп шамасы үш шақырымдай болды. Сол жердің жынысының ақ сазды құрамы көлдің түсін ағартып қазіргі атауға ие болды.

«Қаһан көлі» — Ақкөл ауылының батыс беткейінде 3 шақырымдай жерде орналасқан. Көлді айнала жыңғылдар қоршап жатыр. Көлдің солтүстік жағынан жыра салып сыздықтап су ағады. Қазақтар мен қалмақтар арасындағы кезекті бір қақтығыста қазақтың Қаһарман атты қолбасшысы калмақтарды тас-талқан етіп жеңіп, елден асыра қуып тастап, сулы-нулы осы көлдің жағасына келіп бірнеше күн дамылдап, жеңістерін тойлапты-мыс. Сол батыр Қаһарманның құрметіне «Қахан төбе» немесе «Қаһан көлі» деп қысқаша аталып кеткен.

«Қоян көл» Ақкөл ауылының оңтүстік батыс беткейінде 4-5 шақырым жерде орналасқан. Шамамен 10 шақырым аумақты алады. Мал өсіруге қолайлы болғандықтан көл айналасына жағалай шаруа қожалықтары қоныстанған. Он тоғызыншы ғасырдың орта түсында Қоян есімді азамат осы көлдің етегін жайлап, өмір сүріпті, Үш рет қажылыққа барып «Қоян қажы» есімімен дараланған оның құрметіне бұл көл «Қоян көлі» атанған.

«Дәуіт көлі» — Ақкөл ауылының солтүстік батыс беткейінде 2 шақырымдай қашықтықта. 10-12 шақырым көлдің айналасы қалың жыңғыл, құнарлы шөпке толы. Өткен ғасырдың басында Дәуіт атты адам мал өсіріп, ауқаттылар қатарына жетіпті, келе-келе байлығы басынан асқан. Маңайдағы елге кеп қарасып, талайдың алғысын алыпты. Құрметіне Дәуіт есімін берген.

«Егіндікөл» — бертініректе пайда болған көл. Осы маңдағы алғашқы колхоздардың бірі - «Жаңа жол» көл етегіне қауын, қарбыз, қызанақ, қияр, жуа, қырыққабат өсіріп, даңқы жайылған. «Егіндікөл» - колхозшылардың ырыс кезі болған. Сол ел-жұрт таңған атау әлі күнге сақталып, ұрпаққа жалғасын табуда.

«Қамысты көл» — Бұл көл өте ерте пайда болып, айналасы ит тұмсығы батпайтын қамыс болған. Маңайдағы ел қамысын орып отындыққа пайдаланған, қора-жай салған. Бертін келе қамысы сирей түскен. Осылай әлі күнге «Қамысты көл» атанып келеді.

«Тортай көлі» — Соғыс жылдарында маңайдағы колхоздар көлді біршама құрғатып, тары егістігіне ден қойған. Сол тарыны сабағынан айырып, жинаған соң қауызынан бөлектеу үшін жылқының аяғына таптатып (тоқ) 6астырады екен. Әрбір тоққа 7-8 жылқыны пайдаланады. Солардың ішінен торы тай су ішемін деп барып, тұсаулы күйінде көлге батып кетеді. Содан бұл көл «Тортай көлі» атанады.

«Сазды көл» — Оңтүстік беткейінде шағын саз төбе бар. Маңайдағы сазынан тұрғындар тас соғып үй тұрғызған, сылаққа пайдаланған. Осы себепті «Сазды көл» атауын еншілеген.

«Табан көл» — Алыстан қарағанда аттың аяғына мұздақта таймас үшін қағылатын тағаға ұқсаңқырағандықтан «Табан көл» деп атаған.

«Қара көл» — Ақкөл ауылының іргесінде тиіп тұр. Өзге көлдер сияқты айналасында құрақ, не қоға, жасыл шөп өспеген, суы тұщы.

Дереккөздер[өңдеу | қайнарын өңдеу]

  1. "Қазақ энциклопедиясы", X том
  2. 2009 жылғы Қазақстан Республикасы халқының Ұлттық санағының қорытындылары. Астана 2011. 1 том
  3. Атырау облысы Құрманғазы ауданының қысқаша энциклопедиясы. «ҚазПолиграфОрталығы» ЖШС, Алматы, 2001
  4. Киелі мекен, қасиетті өлке -Құрманғазы. Ағатай баспасы, Атырау-1920 ж. ISBN 978-601-7861-86-5