Ақ Орда (роман)

«Ақ Орда» — Дүкенбай Досжанның қалам ұшынан шыққан романы, 2005 жылы жарияланды.

Автор прологта келесідей ой-түйін келтіреді:

Тарих тереңінен тартып сөйлесек қазақтың төлтума мемлекеттігінің, яғни, өз алдына жеке орда тігіп, өз билеушісі, өз ата заңы, өз ғаскері, өз теңгесі болғанына биыл тура 540 жыл толып отыр... Әрине таза қазақ хандығының Алтын Ордадан енші алған Ақ Ордасы сонау 1465 жылдан бері мемлекет ретінде үзілмей, дамылсыз өмір сүре алмады. Арада екі ғасырдай іргесі ыдырады. Баяғы үйсін, қарахан, оғыз, қимақ, дешті-қыпшақ мемлекеттік құрылымдары секілді тарих аренасына шыға салып, шеткі жаулармен жан алып, жан беріп жұлқысып жүріп, іргесі сөгілді, хандығы үзіліп қалды. Одан беріде терістігі ормандай орыстың, түстігі қоқанның боданына түсті. Әйтсе де бабалардың асыл рухы аяқ асты болған жоқ. Халық санасындағы таза қазақ мемлекеттігінің бастау бұлағында тұрған Ақ Орданың атын дүркін-дүркін еске алып, жүректің төріне шығарып, келешекте 550 жылдығын, я болмаса 600 жылдығын атап өтетін күнге де жетерміз!

Аннотацияда кітаптың тақырыбы туралы былай жазылған:

... бастан тайған тәуелсіздік қазаққа бес жарым ғасырдан кейін ғана, 1991 жылы бұйырды. Өз қолы өзіне жетіп, бүкілхалықтық референдум өткізіп, тұңғыш Президентін жүрекжарды ниетімен сайлап алды. Кітап Ақ Орданың екінші мәрте дүниеге, тарих аренасына қайта шығуы, қазақ мемлекеттігінің ірге бекітуі туралы. Бас кейіпкері — Нұрсұлтан Әбішұлы Назарбаев. Екінші рет бұйырған тәуелсіздік оқиғаларын жеке тұлғаның төңірегіне үйіріп әкеп, ел тағдырын қозғайтын: инаугурация, шет елге мойындату, реформалар, ата заңды қабылдау, шекараны шегелеу, Байқоңыр келісімі, Сарыарқа төріне жаңа Астана салу, реформадағы қиындықтар, қысқасы, жазушы көзіндегі кезеңді оқиғалар шоғыры бас кейіпкердің ой ағыны арқылы өріледі.

Роман төрт бөлімнен құралған.