Батиаль шөгінділер

Батиаль шөгінділер — мұхит төсеніші мен мұхит (теңіз) қайраңдары аралығындағы тереңдіктерге (200 — 2500 м) тән шөгінділер. Ең жиі кездесетін түзілім түрлері — терригендік шөгінділер (алевритті және пелитті лайлар). Ал егер құрлық өңірінен келіп жететін терригенді материалдар аз болса, онда биогенді шөгінділердің үлес салмағы айтарлықтай артады. Олар жылы сулы аймақтарда карбонатты шөгінділер (фораминиферлі, маржанды карбонаттар), ал салқын сулы өңірлерде кремнийлі түзілімдер (кремнийлі-губкалы, диатомды шөгінділер) түрінде ұшырасады. Батиаль шөгінділердің түйіршіктері әдетте іріктелмеген, оларда су асты сырғымалары мен суспензиялық ағым белгілері жиі кездеседі. Батиаль шөгінділер құрамында органикалық көміртек мөлшері біршама мол болады. ^[1]